रत्नागिरी : रत्नागिरी तालुक्यातील शितपवाडी आणि बौद्धवाडी परिसरात झालेल्या चक्रीवादळामुळे मोठे नुकसान झाले आहे. वादळाच्या तडाख्याने अनेक घरे, शाळांचे शौचालय, गोठे, मटणशॉप, वाचनालय आणि दुकानांवरील छपराचे पत्रे उडून गेले. यात मिलिंद जाधव यांच्यासह अन्य जाधव कुटुंबीयांचे मोठे नुकसान झाले आहे. तसेच, दीपक पाष्टे यांच्यासह अन्य पाष्टे कुटुंबीयांसह एकूण सोळा जणांना चक्रीवादळाचा फटका बसून त्यांचे मोठे नुकसान झाले आहे.
या नैसर्गिक आपत्तीमध्ये केवळ मालमत्तेचेच नाही, तर जीवित आणि पशुधनाचेही नुकसान झाले आहे. करबुडे गावात वीज कोसळून रमेश देमा धनावडे यांच्या मालकीच्या दोन बैलांचा मृत्यू झाला.
याव्यतिरिक्त, करबुडे येथील शर्वरी तांबे (वय १५) ही दहावीत शिकणारी विद्यार्थिनी घरी जात असताना तिच्या बाजूला वीज पडल्याने तिला विजेचा धक्का बसला आणि ती जखमी झाली आहे.
घटनेची माहिती मिळताच तहसीलदार राजाराम म्हात्रे हे तातडीने कर्मचाऱ्यांसह घटनास्थळी दाखल झाले. त्यांनी नुकसानग्रस्त भागाची पाहणी केली आहे. आज, शुक्रवारी सविस्तर पंचनामे करण्याचे काम हाती घेण्यात येणार असल्याचे तहसीलदार म्हात्रे यांनी सांगितले. या पंचनाम्यांनंतर नुकसानीचा नेमका आकडा स्पष्ट होईल आणि नुकसानग्रस्तांना शासकीय मदत मिळण्याची प्रक्रिया सुरू होईल.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:10 16-10-2025
