रत्नागिरी : महिला बाल विकास विभाग, बालविकास प्रकल्प रत्नागिरी यांच्या संयुक्त विद्यमाने ‘राष्ट्रीय पोषक अभियाना’अंतर्गत ‘पोषक माह’ कार्यक्रमाचे आयोजन करण्यात आले होते. रत्नागिरीतील शाळा क्र. ६ येथे पार पडलेला हा कार्यक्रम मोठ्या उत्साहात संपन्न झाला. यावेळी शिवसेना महिला शहर संघटक व माजी नगरसेविका वैभवी खेडेकर यांनी उपस्थित पालक, अंगणवाडी सेविका आणि मुलांना निरोगी आयुष्यासाठी संतुलित आहाराचे महत्त्व पटवून दिले.
केंद्र सरकारच्या ‘राष्ट्रीय पोषक अभियाना’चा भाग म्हणून दरवर्षी सप्टेंबर महिन्यात ‘पोषक माह’ साजरा केला जातो. याचाच एक भाग म्हणून रत्नागिरी बालविकास प्रकल्पाने हा जनजागृतीपर कार्यक्रम आयोजित केला होता. मुलांमधील कुपोषण कमी करणे, पौष्टिक आहाराविषयी जनजागृती करणे आणि सुदृढ आरोग्याचा पाया मजबूत करणे हा यामागील मुख्य उद्देश होता.
या कार्यक्रमाला प्रमुख मार्गदर्शक म्हणून वैभवी खेडेकर उपस्थित होत्या. त्यांनी आपल्या मार्गदर्शनात आजच्या धावपळीच्या युगात आरोग्यदायी जीवनशैलीचे महत्त्व अधोरेखित केले. त्या म्हणाल्या, “मुलांच्या शारीरिक आणि बौद्धिक विकासासाठी पौष्टिक आणि संतुलित आहार अत्यंत आवश्यक आहे. पालकांनी जंक फूड टाळून मुलांना घरगुती, ताजा आणि सर्वसमावेशक आहार देण्यावर भर दिला पाहिजे.”
खेडेकर यांनी विशेषतः पालकवर्गाला आणि अंगणवाडी सेविकांना मार्गदर्शन केले. त्यांनी सांगितले की, मुलांच्या आहारात पालेभाज्या, फळे, कडधान्ये आणि दुग्धजन्य पदार्थांचा नियमित समावेश कसा करावा, याबद्दल त्यांनी सोप्या भाषेत माहिती दिली. “अंगणवाडी सेविका या आरोग्य व्यवस्थेचा आणि बालकांच्या पोषणाचा महत्त्वाचा दुवा आहेत. त्यांनी पालकांचे योग्य प्रबोधन केल्यास निरोगी पिढी घडवण्यास नक्कीच मदत होईल,” असा विश्वासही त्यांनी व्यक्त केला.
या ‘पोषक माह’ कार्यक्रमाला पालकवर्गाचा आणि अंगणवाडी सेविकांचा उत्स्फूर्त प्रतिसाद मिळाला. उपस्थितांनी आहारविषयक विविध शंका विचारून त्यांचे निरसन करून घेतले. या यशस्वी कार्यक्रमामुळे रत्नागिरीतील शेकडो कुटुंबांपर्यंत संतुलित आहाराचा संदेश पोहोचण्यास मदत झाली आहे.
