रत्नागिरी : रत्नागिरीच्या सांस्कृतिक आणि कला विश्वासाठी एक अत्यंत आनंदाची बातमी आहे. शहराची वाढती सांस्कृतिक भूक लक्षात घेऊन आणि स्थानिक कलाकारांना हक्काचे व्यासपीठ मिळवून देण्यासाठी पालकमंत्री उदय सामंत यांच्या संकल्पनेतून रत्नागिरीत एक सुसज्ज ‘मिनी थियेटर’ (Mini Theatre) उभे राहिले आहे. या नव्या नाट्यगृहामुळे रत्नागिरीची सांस्कृतिक चळवळ अधिक समृद्ध होण्यास मोठी मदत होणार आहे.
मिळालेल्या माहितीनुसार, या बहुप्रतिक्षित मिनी थियेटरचा शुभारंभ येत्या ७ नोव्हेंबर रोजी सायंकाळी ६ वाजता पालकमंत्री उदय सामंत यांच्या शुभहस्ते होणार आहे. रत्नागिरीच्या सांस्कृतिक क्षेत्रात या वास्तूमुळे एक मोलाची भर पडणार असल्याची भावना कला वर्तुळातून व्यक्त होत आहे.
बस स्थानकासमोर, ३०० आसनी व्यवस्था
रत्नागिरी बस स्थानकासमोर असणाऱ्या ‘अरिहंत मॉल’ येथील तिसऱ्या मजल्यावर हे मिनी थियेटर साकारण्यात आले आहे. या ठिकाणी तब्बल ३०० खुर्च्यांची आरामदायी आसनव्यवस्था करण्यात आली आहे. तसेच, कलाकारांना सादरीकरणाचा उत्तम अनुभव मिळावा, यासाठी रंगमंचाची रचना देखील अतिशय कल्पकतेने करण्यात आली आहे.
कलाकारांसाठी ठरणार वरदान
रत्नागिरीत अनेक हौशी आणि व्यावसायिक कलाकार आहेत, मात्र त्यांना सराव किंवा छोटे प्रयोग करण्यासाठी अनेकदा जागेची अडचण भासत होती. हे नवे मिनी थियेटर ही उणीव भरून काढणार आहे. छोट्या-मोठ्या एकांकिका स्पर्धा, विविध सांस्कृतिक कार्यक्रम, कार्यशाळा, नाटकांचे सराव अथवा व्यावसायिक नाटकांचे प्रयोग करण्यासाठी या जागेचा अतिशय मोलाचा उपयोग होणार आहे.
संस्कृत विश्व विद्यालयाकडे व्यवस्थापन
या मिनी थियेटरच्या व्यवस्थापनाची जबाबदारी ‘कवी कुलगुरू कालिदास संस्कृत विश्व विद्यालय, रत्नागिरी उपकेंद्र’ यांच्याकडे राहणार असल्याची प्राथमिक माहिती मिळाली आहे. पालकमंत्री उदय सामंत यांच्या दूरदृष्टीतून साकारलेले हे मिनी थियेटर रत्नागिरीच्या कला परंपरेला नक्कीच एका वेगळ्या उंचीवर घेऊन जाईल, असा विश्वास व्यक्त केला जात आहे.
