रत्नागिरी : सोलापूर जिल्ह्यात सप्टेंबर महिन्यात झालेल्या अतिवृष्टी आणि महापुराचा (Solapur Floods) फटका बसलेल्या गरजू विद्यार्थ्यांच्या शिक्षणासाठी रत्नागिरीतील ‘हेल्पिंग हॅंडस’ (Helping Hands Ratnagiri) या विविध सामाजिक संस्थांच्या फोरमने पुन्हा एकदा दातृत्वाची साद घातली. या सादेला प्रतिसाद देत रत्नागिरीकरांनी दिलेल्या मदतीतून जमा झालेला ७ लाख ६५ हजार ६०० रुपयांचा निधी, हेल्पिंग हॅंडसच्या कार्यकर्त्यांनी थेट सोलापूर जिल्ह्यातील कुर्डुवाडी (Kurduwadi) गाठून १२८ पूरग्रस्त विद्यार्थ्यांना वितरित केला.
७० वर्षांत प्रथमच सीना नदीला महापूर
सप्टेंबर २०२५ मध्ये मराठवाडा आणि सोलापूर जिल्ह्यात झालेल्या अतिवृष्टीमुळे सीना नदीला (Sina River Flood) प्रचंड पूर आला. वास्तविक, सीना नदी ही ‘दुष्काळी नदी’ म्हणून ओळखली जाते आणि मागील सत्तर वर्षांत या नदीला कधीही पूर आला नव्हता. त्यामुळे या नदीला पूरनियंत्रण रेषाही नव्हती.
या अनपेक्षित महापुराचा फटका माढा तालुक्यातील सीना नदीच्या पट्ट्यातील वीस गावांना बसला. पुराच्या पाण्याचा अंदाज नसल्याने लोकांचे, शेतीचे, घरांचे आणि मालमत्तेचे अतोनात नुकसान झाले.
रत्नागिरीच्या दातृत्वाला पुन्हा साद
प्रत्येक नैसर्गिक संकटाच्या वेळी मदतीसाठी धावून जाणाऱ्या रत्नागिरीतील ‘हेल्पिंग हॅंडस’च्या कार्यकर्त्यांनी या पूरग्रस्तांसाठीही धावून जाण्याचा निर्णय घेतला. राजू भाटलेकर आणि वल्लभ वणजू यांच्या संकल्पनेला उचलून धरत, सेवानिवृत्त विभागीय पोलिस अधिकारी शिरीष सासने, कौस्तुभ सावंत, सुहास ठाकूरदेसाई, प्रमोद खेडेकर, निलेश मलुष्टे, जयंतीलाल जैन, नंदकिशोर चव्हाण, संजय वैशंपायन आदी कार्यकर्त्यांनी पुन्हा एकदा रत्नागिरीच्या दातृत्वाला साद घातली.
या आवाहनाला करसल्लगार संघटना (रत्नागिरी जिल्हा), पाटीदार समाज, जनरल प्रॅक्टिशनर डॉक्टर असोसिएशन (रत्नागिरी) यांच्यासह अनेक रत्नागिरीवासीयांनी भरभरून प्रतिसाद दिला. महिनाभरात एकूण ७ लाख ६५ हजार ६०० रुपयांचा निधी जमा झाला.
थेट कुर्डुवाडीत जाऊन २४ तासांत मदत
जमा झालेला निधी वेळेवर आणि योग्य लाभार्थ्यांपर्यंत पोहोचवणे हे मोठे आव्हान होते. हे कार्य पूर्ण करण्यासाठी ‘हेल्पिंग हॅंडस’चे प्रतिनिधी म्हणून शिरीष सासने, कौस्तुभ सावंत, वल्लभ (भैय्या) वणजू, प्रमोद खेडेकर, संजय वैशंपायन आणि जयेश दिवाणी हे ३ नोव्हेंबर रोजी पहाटे खासगी वाहनाने कुर्डुवाडीसाठी निघाले.
या महापुरामुळे ज्या मुला-मुलींच्या उच्च शिक्षणात अडथळा आला होता, अशा १२८ गरजू विद्यार्थ्यांना प्रत्येकी ५,८०० रुपये याप्रमाणे चेक व ऑनलाइन पद्धतीने मदतीचे वितरण करण्यात आले. अथक २४ तासांचा प्रवास करून हे सर्व कार्यकर्ते ४ नोव्हेंबर रोजी पहाटे एक वेगळा आनंद आणि समाधान घेऊन रत्नागिरीत परतले.
गरजू विद्यार्थ्यांची अचूक निवड
रत्नागिरीपासून दूरवर असणाऱ्या पूरग्रस्त भागातील खऱ्या गरजू विद्यार्थ्यांची निवड करणे हे एक जटिल काम होते. यासाठी महत्त्वाचा दुवा ठरले ते टेंभुर्णी येथील विठ्ठलराव शिंदे कला महाविद्यालयाचे प्राचार्य महेंद्र कदम.
हेल्पिंग हॅंडसचे वल्लभ वणजू यांच्या संपर्कातून प्राचार्य कदम यांनी कुर्डुवाडीसारख्या दुर्गम पूरग्रस्त गावांमधील नुकसानीची सविस्तर माहिती गोळा केली. सीना नदीकाठच्या वीस लहानमोठ्या गावांमधील विविध महाविद्यालयांतून खऱ्या अर्थाने गरजू विद्यार्थ्यांची यादी तयार करण्यात आली. यासाठी त्यांना स्थानिक डॉ. आशिष राजपूत, माध्यम प्रतिनिधी किरण चव्हाण आणि प्राचार्य नितीन उबाळे यांनी मोलाचे सहकार्य केले. या सर्वांच्या सहकार्यानेच मदतीचा योग्य विनियोग करता आल्याचे हेल्पिंग हॅंडसच्या कार्यकर्त्यांनी सांगितले.
“ही पहिलीच मोठी मदत”; विद्यार्थ्यांची भावनिक प्रतिक्रिया
पूरबाधित झालेल्या माढा तालुक्यातील विद्यार्थ्यांना एवढ्या मोठ्या रोख रकमेची मिळालेली ही पहिलीच मदत ठरली. ही मदत अगदी वेळेवर मिळाल्याची भावनिक भावना विद्यार्थ्यांनी व्यक्त केली. प्राचार्य महेंद्र कदम यांनी आभार मानताना सांगितले, “या मदतीमुळे आमच्या लोकांमध्ये आणि विद्यार्थ्यांमध्ये एक नवचैतन्य निर्माण झाले आहे.”
“भविष्यात आम्हीही अशाच प्रकारे गरजूंना मदत करून या मदतीची परतफेड करू,” अशा शब्दांत लाभार्थी विद्यार्थ्यांनी रत्नागिरीच्या या दिलदार जनतेचे आभार मानले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:32 13-11-2025
