चिपळूण: चिपळूण-संगमेश्वर विधानसभा मतदारसंघातील कासारकोळवण गावाची गेल्या चार ते पाच दशकांपासून असलेली प्रलंबित मागणी अखेर पूर्ण झाली आहे. गावाला जोडणाऱ्या नवीन पुलासाठी तब्बल ६.५० कोटी रुपयांचा निधी मंजूर झाला असून, या निर्णयामुळे ग्रामस्थांमध्ये आनंदाचे वातावरण आहे. या महत्त्वपूर्ण विकासकाकामाचे श्रेय आमदार शेखर निकम यांच्या अथक प्रयत्नांना दिले जात आहे.
काय होती समस्या? कासारकोळवण गावाचा पावसाळ्यात नदीला पूर आल्यामुळे मुख्य भूमीशी संपर्क तुटत असे. यामुळे गेल्या अनेक वर्षांपासून शालेय विद्यार्थी, शेतकरी, रुग्ण आणि सामान्य नागरिकांना दरवर्षी मोठ्या संकटांचा सामना करावा लागत होता. अनेकदा जीव धोक्यात घालून नागरिकांना प्रवास करावा लागत होता, ज्यामुळे ग्रामस्थांमध्ये भीतीचे वातावरण असायचे.
आमदार शेखर निकम यांचा पाठपुरावा स्थानिक नागरिकांच्या या समस्यांची दखल घेत आमदार शेखर निकम यांनी पुलाचा प्रश्न विधिमंडळाच्या अधिवेशनात प्रकर्षाने मांडला. प्रशासनाचे लक्ष वेधून घेत त्यांनी सातत्याने पाठपुरावा केला. ‘सीआरएफ’ (CRF) अंतर्गत निधी मिळवण्यासाठी दिल्ली दरबारी जाऊन संबंधित अधिकाऱ्यांशी चर्चा केली. अखेर त्यांच्या या प्रयत्नांमुळे पुलाच्या कामाला तांत्रिक आणि आर्थिक मंजुरी मिळाली आहे.
ग्रामस्थांकडून आभार प्रदर्शन पुलाच्या मंजुरीनंतर कासारकोळवण येथील ग्रामस्थांनी आमदार शेखर निकम यांचे सावर्डे येथील जनसंपर्क कार्यालयात जाऊन विशेष आभार मानले. यावेळी गावातील प्रमुख पदाधिकारी आणि ग्रामस्थ मोठ्या संख्येने उपस्थित होते.
यावेळी प्रामुख्याने:
- सरपंच: मानसी करंबळे
- उपसरपंच: प्रकाश तोरसकर
- पोलीस पाटील: महेंद्र करंबळे
- तंटामुक्ती अध्यक्ष: नथुराम करंबळे तसेच सदांद करंबळे, राजाराम तोरसकर, सुहास मांगले, उल्हास मांगले, सोन्या मांगले, बाळकृष्ण तोरसकर, रोशन कदम, प्रशांत करंबळे यांसह ग्रामस्थ उपस्थित होते.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:27 21-04-2026
