आंतरराष्ट्रीय धार्मिक संघटनेच्या व्हॉट्सॲप ग्रुपशी संबंध असल्याच्या संशयावरून कारवाई; चौकशीनंतर तिघांना सोडले
राजापूर: दहशतवादविरोधी पथक (ATS – नवी मुंबई) आणि भारतीय गुप्तचर विभाग (IB) यांच्या संयुक्त पथकाने राजापूर शहरात अचानक धडक कारवाई करत एकाच कुटुंबातील तिघांना चौकशीसाठी ताब्यात घेतले. एका आंतरराष्ट्रीय धार्मिक संघटनेशी संबंधित व्हॉट्सॲप ग्रुपशी संपर्क असल्याच्या संशयावरून ही संयुक्त कारवाई करण्यात आली. गुप्तचर यंत्रणांनी थेट राजापुरात येऊन केलेल्या या मोहिमेमुळे राजापूर शहरासह संपूर्ण रत्नागिरी जिल्ह्यात विविध चर्चांना उधाण आले आहे.
पती, पत्नी आणि मुलीला ताब्यात घेऊन बंद दाराआड चौकशी
गुप्तचर यंत्रणांकडून मिळालेल्या अत्यंत गोपनीय माहितीच्या आधारे नवी मुंबई एटीएस आणि आयबीच्या पथकाने स्थानिक पोलिसांच्या सहकार्याने राजापूर शहरात ही विशेष मोहीम राबवली. पथकाने शहरातील एका घरावर छापा टाकत पती, पत्नी आणि त्यांची मुलगी अशा एकाच घरातील तिघांना ताब्यात घेतले. त्यानंतर त्यांना तात्काळ राजापूर पोलीस ठाण्यात आणून दिवसभर बंद दाराआड कसून चौकशी करण्यात आली. संबंधित यंत्रणांच्या वरिष्ठ अधिकाऱ्यांनी त्यांच्याकडील मोबाईल, सोशल मीडिया अकाऊंट्स आणि संशयास्पद संवादाबाबत सखोल तपासणी केली.
Rajapur ATS IB Joint Operation: स्थानिक पोलिसांकडून कमालीची गुप्तता; सायंकाळी उशिरा सुटका
दिवसभर चाललेल्या या मॅरेथॉन चौकशीनंतर सायंकाळी उशिरा संबंधित कुटुंबातील तिघांनाही यंत्रणांनी सोडून दिले. मात्र, या अत्यंत संवेदनशील कारवाईबाबत स्थानिक पोलीस प्रशासनाने कमालीची गुप्तता बाळगली असून कोणतीही अधिकृत माहिती अथवा प्रतिक्रिया देण्यास नकार दिला आहे.
केवळ संशयास्पद डिजिटल व्हॉट्सॲप ग्रुपमधील सहभागावरून केंद्रीय व राज्य पातळीवरील सर्वोच्च तपास यंत्रणांनी थेट राजापुरात येऊन चौकशी केल्याने स्थानिक नागरिकांमध्ये आणि राजकीय वर्तुळात उलटसुलट चर्चा सुरू आहे.
