Supreme Court Hearing CEC Gyanesh Kumar: मुख्य निवडणूक आयुक्तांवविरोधातील सर्व याचिका सर्वोच्च न्यायालयात मंजूर; २७ ऑक्टोबरला होणार सुनावणी

निवडणूक आयोगासह ३ आयुक्तांना प्रतिवादी; राहुल गांधींसह ११ प्रमुख नेत्यांचा याचिकाकर्त्यांमध्ये समावेश

नवी दिल्ली: मुख्य निवडणूक आयुक्त ज्ञानेश कुमार यांच्याविरोधातील अडचणींमध्ये मोठी वाढ होण्याची चिन्हे आहेत. निवडणूक प्रक्रियेतील अनियमितता, मतदार याद्यांमधील त्रुटी आणि विशेष सखोल पुनरीक्षण (SIR) प्रक्रियेवरून ज्ञानेश कुमार यांच्याविरोधात दाखल करण्यात आलेल्या सर्व याचिका सर्वोच्च न्यायालयाने (Supreme Court) अधिकृतपणे मंजूर केल्या आहेत. न्यायालयाने या सर्व याचिका एकत्र करत त्यावर आगामी २७ ऑक्टोबर रोजी सुनावणी घेण्याचा अत्यंत महत्त्वपूर्ण निर्णय घेतला आहे.

निवडणूक आयोगासह तीनही आयुक्तांना सर्वोच्च न्यायालयाची नोटीस; प्रतिवादी म्हणून समावेश
सुप्रीम कोर्टाने या प्रकरणातील सर्व याचिका स्वीकारताना मुख्य निवडणूक आयुक्तांसह इतर दोन निवडणूक आयुक्तांनाही प्रतिवादी (Respondents) केले आहे. त्यानुसार मुख्य निवडणूक आयुक्त ज्ञानेश कुमार, निवडणूक आयुक्त सुखबीर सिंग संधू आणि विवेक जोशी यांना या प्रकरणात प्रतिवादी बनवण्यात आले आहे. यामध्ये विरोधी पक्षांचे प्रमुख नेते राहुल गांधी, मल्लिकार्जुन खर्गे, अखिलेश यादव, तेजस्वी यादव, खासदार संजय राऊत, सुप्रिया सुळे, एम. ए. बेबी, डी. राजा, महुआ माझी, सौगत रॉय आणि ई. टी. मोहम्मद बशीर या ११ प्रमुख नेत्यांचा याचिकाकर्त्यांमध्ये समावेश आहे.

फॉर्म ६ (Form 6) बाबत सर्वोच्च न्यायालयाचे महत्त्वपूर्ण स्पष्टीकरण
या सुनावणीदरम्यान सर्वोच्च न्यायालयाने ‘फॉर्म ६’ (Form 6) बाबत एक अत्यंत महत्त्वाचा खुलासा केला आहे. न्यायालयाने स्पष्ट केले आहे की, त्यांनी फॉर्म ६ बाबत आजवर कोणताही अंतिम निर्णय दिलेला नाही. तसेच, बिहारमध्ये फॉर्म ६ बाबत असा कोणताही मुद्दा नव्हता आणि न्यायालयाने सुधारित फॉर्म ६ ला कोणतीही अधिकृत मान्यता दिलेली नाही, असे न्यायालयाने स्पष्ट केले आहे.

सीजेआयंचा सल्ला आणि विरोधकांचा सर्वोच्च न्यायालयावर मोर्चा
या घडामोडींपूर्वी, ‘इंडिया’ (INDIA) आघाडीच्या नेत्यांनी सरन्यायाधीशांची भेट घेण्यासाठी वेळ मागितली होती. मात्र, अधिकार श्रेणी आणि घटनात्मक मर्यादांचा हवाला देत सरन्यायाधीशांनी नेत्यांना भेटण्यास नकार दिला होता. थेट भेटण्याऐवजी न्यायालयात अधिकृत याचिका दाखल करण्याचा सल्ला सरन्यायाधीशांनी राहुल गांधी यांना दिला होता. त्यानुसार राहुल गांधींच्या कायदेशीर टीमने सर्वोच्च न्यायालयाच्या रजिस्ट्रीमध्ये याचिका दाखल केली असून तिला डायरी नंबरही मिळाला आहे. न्यायालयाच्या या निर्णयानंतर काँग्रेस अध्यक्ष मल्लिकार्जुन खर्गे आणि लोकसभेतील विरोधी पक्षनेते राहुल गांधी यांच्या नेतृत्वाखाली सर्व विरोधी पक्षांनी पुन्हा एकदा आक्रमक होत सर्वोच्च न्यायालयाच्या दिशेने मोर्चा काढला आणि मुख्य निवडणूक आयुक्त ज्ञानेश कुमार यांच्या तातडीच्या राजीनाम्याची मागणी लावून धरली आहे.