गुहागर (पाटनहाळे): गुहागर तालुक्यातील पाटनहाळे येथे रस्त्यावर अनधिकृतपणे मासे विक्री करणाऱ्यांविरोधात पाटपन्हाळे ग्रामपंचायतीने कठोर भूमिका घेतली आहे. वारंवार सूचना देऊनही नियमांचे उल्लंघन करणाऱ्या मासे विक्रेत्यांवर तातडीने कायदेशीर कारवाई करावी, अशी मागणी ग्रामपंचायतीने थेट गुहागर पोलिसांकडे लेखी पत्राद्वारे केली आहे.
काय आहे नेमके प्रकरण? पाटपन्हाळे ग्रामपंचायतीच्या समोर मासे विक्रेत्यांसाठी सुसज्ज बाजारपेठ (मार्केट) उपलब्ध करून देण्यात आली आहे. मात्र, नियमांना बगल देत काही विक्रेत्यांकडून मुख्य बाजारपेठेच्या (शृंगारतळी) रस्त्यावर बसून मासे विक्री केली जात आहे. या प्रकारामुळे नागरिकांना अनेक समस्यांना सामोरे जावे लागत आहे.
रस्त्यावरील मासे विक्रीमुळे समस्यांचा डोंगर:
- रहदारीस अडथळा: वर्दळीच्या ठिकाणी मासे विक्री केल्यामुळे ये-जा करणाऱ्या वाहनचालकांना आणि पादचाऱ्यांना मोठ्या त्रासाला सामोरे जावे लागत आहे.
- आरोग्याचा प्रश्न आणि दुर्गंधी: रस्त्यावर मासे साफ केल्यामुळे उडणारे खवले आणि सांडलेल्या दूषित पाण्यामुळे परिसरात मोठ्या प्रमाणावर दुर्गंधी पसरत आहे. यामुळे सार्वजनिक आरोग्याचा प्रश्न निर्माण झाला आहे.
- व्यापाऱ्यांची अडचण: रस्त्यावरील या अनधिकृत विक्रीमुळे स्थानिक व्यापाऱ्यांच्या व्यवसायावरही परिणाम होत आहे.
ग्रामपंचायतीचा इशारा व पोलीस तक्रार: ग्रामपंचायत प्रशासनाकडून यापूर्वी अनेकदा संबंधित विक्रेत्यांना बाजार गाळ्यांमध्ये जाऊन बसण्याच्या सूचना देण्यात आल्या होत्या. ग्रामपंचायत कर्मचारी स्वतः त्यांना विनंती करण्यासाठी गेले होते, मात्र विक्रेत्यांनी या सूचनांकडे पूर्णपणे दुर्लक्ष केले आहे. प्रशासनाच्या नियमांना न जुमानता सार्वजनिक ठिकाणी मासे विक्री सुरूच असल्याने, अखेर ग्रामपंचायतीने पोलिसांकडे धाव घेतली आहे. आता यावर पोलीस प्रशासन कोणती भूमिका घेते, याकडे सर्वांचे लक्ष लागले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
13:43 21-04-2026
