रत्नागिरी: रत्नागिरी तालुक्यातील टिके भातडेवाडी परिसरातून एक अत्यंत धक्कादायक बातमी समोर आली आहे. सततचे आजारपण आणि दारूच्या व्यसनामुळे त्रस्त असलेल्या ४१ वर्षीय तरुणाने आपल्या राहत्या घरी गळफास लावून आत्महत्या केल्याची दुर्दैवी घटना घडली आहे. या घटनेमुळे परिसरात हळहळ व्यक्त केली जात आहे.
नेमकी घटना काय? मयत मंगेश तुकाराम कांबळे (वय ४१, रा. टिके भातडेवाडी, रत्नागिरी) असे आत्महत्या केलेल्या तरुणाचे नाव आहे. मिळालेल्या प्राथमिक माहितीनुसार, मंगेश कांबळे हे गेल्या काही काळापासून गंभीर आजारपणाशी झुंज देत होते. सततच्या आजारपणामुळे ते शारीरिक आणि मानसिकदृष्ट्या खचले होते. त्यातच त्यांना दारूचे व्यसन जडल्याने त्यांच्या कौटुंबिक आणि वैयक्तिक आयुष्यावर त्याचा गंभीर परिणाम होत होता.
या दुहेरी त्रासामुळे आलेल्या नैराश्यातून त्यांनी हे टोकाचे पाऊल उचलल्याचे समजते. २१ एप्रिल रोजी रात्री ९ वाजल्यापासून ते २२ एप्रिल रोजी सकाळी ७ वाजेच्या दरम्यान, त्यांनी आपल्या राहत्या घरी कोणाच्याही नकळत गळफास घेऊन आपली जीवनयात्रा संपवली.
पोलिसांकडून आकस्मिक मृत्यूची नोंद सकाळी हा प्रकार उघडकीस आल्यानंतर स्थानिक रहिवाशांनी तत्काळ पोलिसांना माहिती दिली. घटनेची माहिती मिळताच रत्नागिरी पोलीस घटनास्थळी दाखल झाले. पोलिसांनी मृतदेहाचा पंचनामा करून उत्तरीय तपासणीसाठी पाठवला आहे. या प्रकरणी रत्नागिरी पोलीस ठाण्यात बी.एन.एस.एस. (BNSS) कलम १९४ अन्वये आकस्मिक मृत्यू म्हणून नोंद करण्यात आली आहे. पोलीस या प्रकरणाचा अधिक तपास करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:52 24-04-2026
