रत्नागिरी: शिक्षण क्षेत्रातील बदलांचा आढावा घेण्यासाठी आणि मुख्याध्यापकांच्या शैक्षणिक कार्याला बळ देण्यासाठी रत्नागिरी येथे आज (२५ एप्रिल) मुख्याध्यापकांसाठी एकादिवसीय विशेष शैक्षणिक कार्यशाळेचे (कृतीसत्र) आयोजन करण्यात आले आहे. या कार्यशाळेचे उद्घाटन राज्याचे उद्योग मंत्री आणि पालकमंत्री डॉ. उदय सामंत यांच्या हस्ते होणार आहे.
कार्यशाळेचे स्वरूप आणि मान्यवर
माध्यमिक शिक्षण विभाग, जिल्हा परिषद आणि जिल्हा माध्यमिक व उच्च माध्यमिक शाळा मुख्याध्यापक संघ यांच्या संयुक्त विद्यमाने शहरातील ‘जिल्हा माध्यमिक शाळा सेवक सहकारी पतपेढी’ सभागृहात या कार्यशाळेचे आयोजन करण्यात आले आहे. सकाळी १० वाजता सुरू होणाऱ्या या कार्यक्रमास आमदार किरण सामंत आणि आमदार ज्ञानेश्वर म्हात्रे यांची विशेष उपस्थिती लाभणार आहे.
९ मुख्याध्यापकांना ‘गुणवंत पुरस्कार’
या विशेष कार्यक्रमात रत्नागिरी जिल्ह्यातील शिक्षण क्षेत्रातील उत्कृष्ट कार्याची दखल घेऊन नऊ मुख्याध्यापकांना ‘गुणवंत मुख्याध्यापक पुरस्कार’ देऊन गौरवण्यात येणार आहे. सन्मानित होणाऱ्या मुख्याध्यापकांची नावे खालीलप्रमाणे आहेत:
- संदेश कोकाटे (चिपळूण)
- रामचंद्र कापसे (मंडणगड)
- प्रमोद गमरे (दापोली)
- पोपट जगताप (खेड)
- पांडुरंग हासबे (गुहागर)
- रिझवान कारिगर (संगमेश्वर)
- मुलाणी चांदसाहेब (लांजा)
- मधुकर थुळ (रत्नागिरी)
- राजश्री नारे (राजापूर)
याशिवाय, ए.आय. (A.I.) परीक्षेत विशेष प्राविण्य मिळवणारे विद्यार्थी आणि माजी मुख्याध्यापकांचा देखील या सोहळ्यात सत्कार करण्यात येणार असल्याचे मुख्याध्यापक संघाचे अध्यक्ष अय्युब मुल्ला, उपाध्यक्ष संजय चव्हाण आणि सचिव महेश पाटकर यांनी सांगितले.
तज्ज्ञांचे मार्गदर्शन
दिवसभरात चालणाऱ्या या कार्यशाळेत शिक्षण क्षेत्रातील विविध महत्त्वाच्या विषयांवर तज्ज्ञांकडून मार्गदर्शन मिळणार आहे:
१. ११ वी प्रवेश कार्यप्रणाली: डॉ. गणपती कळमकर (सहाय्यक शिक्षण संचालक, कोल्हापूर विभाग). २. आजचे शैक्षणिक वास्तव व मुख्याध्यापकांची भूमिका: डॉ. विलास पाटील (माजी प्राचार्य, प्रशिक्षण संस्था). ३. ताणतणाव आणि व्यवस्थापन: दीपक मेंगणे (माध्यमिक शिक्षणाधिकारी). ४. रजा नियम व अनुषंगिक कार्यवाही: संदेश राऊत (कोषाध्यक्ष, महामंडळ).
शिक्षण क्षेत्रातील अधिकारी आणि तज्ज्ञांच्या उपस्थितीमुळे ही कार्यशाळा रत्नागिरी जिल्ह्यातील शाळांच्या गुणवत्तेसाठी अत्यंत महत्त्वाची ठरणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:43 25-04-2026
