रत्नागिरी : सध्या मे महिन्याचा सुट्टीचा हंगाम सुरू असल्याने रत्नागिरी शहरात पर्यटकांची मोठी गर्दी पाहायला मिळत आहे. मात्र, ऐन पर्यटन हंगामात शहरात दर सोमवारी वीज आणि पाणीपुरवठा खंडीत होत असल्याने शहरातील हॉटेल व्यावसायिक चांगलेच त्रस्त झाले आहेत. रत्नागिरी शहर पर्यटकांची पहिली पसंती ठरत असताना, वीज आणि पाण्याच्या या दुहेरी संकटामुळे हॉटेल चालकांसमोरील अडचणीत मोठी वाढ झाली असून, प्रशासनाने यावर तातडीने मार्ग काढावा, अशी मागणी आता जोर धरू लागली आहे.
पर्यटनाच्या हंगामात मोठी गैरसोय
मे महिन्याच्या सुट्ट्या लागल्याने राज्यभरातून तसेच परराज्यातून पर्यटक मोठ्या संख्येने रत्नागिरीत दाखल होत आहेत. साहजिकच शहरातील हॉटेल्स आणि लॉजेस मोठ्या प्रमाणात आरक्षित आहेत. मात्र, पर्यटकांना चांगल्या सुविधा देताना वीज आणि पाण्याच्या अभावामुळे हॉटेल व्यावसायिकांना मोठ्या मनस्तापाला सामोरे जावे लागत आहे.
नगरपालिकेचा पाणीकपातीचा निर्णय
सध्या वाढत्या तापमानामुळे उन्हाचा तडाखा वाढला असून धरणातील पाण्याचे बाष्पीभवन मोठ्या प्रमाणात होत आहे. पाण्याचे बाष्पीभवन होत असल्याचे कारण देत आता नगरपालिकेने शहरात दर सोमवारी पाणीपुरवठा बंद ठेवण्याचा महत्त्वपूर्ण निर्णय घेतला आहे. हॉटेल व्यवसायात पाण्याची सर्वाधिक गरज असते, मात्र आठवड्यातील एका दिवशी पाणी पूर्णपणे बंद असल्याने व्यावसायिकांची मोठी कोंडी होत आहे.
महावितरणचा ‘मेंटेनन्स’चा शॉक
पाणीटंचाईच्या या समस्येत महावितरणच्या कारभारामुळे आणखीच भर पडली आहे. दर सोमवारी देखभालीच्या आणि दुरुस्तीच्या (मेंटेनन्स) नावाखाली महावितरणकडून शहरात वीज प्रवाह खंडीत केला जातो. पाणी नसताना आणि वीजही गायब असल्याने पर्यटकांसाठी पर्यायी व्यवस्था करणे हॉटेल चालकांना जिकिरीचे जात आहे.
प्रशासनाने तोडगा काढण्याची व्यावसायिकांची मागणी
एकीकडे रत्नागिरी हे पर्यटनाच्या नकाशावर वेगाने पुढे येत आहे आणि निसर्गसौंदर्यामुळे ते पर्यटकांची पहिली पसंती ठरत आहे. मात्र दुसरीकडे, अशा प्राथमिक आणि पायाभूत सुविधांच्या अभावामुळे व्यवसायाचे मोठे नुकसान होत आहे. त्यामुळे स्थानिक प्रशासनाने, नगरपालिकेने आणि महावितरणने समन्वयाने काम करून पर्यटन हंगामात वीज आणि पाणी कपातीबाबत काहीतरी योग्य तोडगा काढावा, अशी आग्रही मागणी आता संतप्त हॉटेल व्यावसायिकांकडून केली जात आहे.
