रत्नागिरी: कोकणातील जागतिक दर्जाचे पर्यटन स्थळ आणि लाखो भाविकांचे श्रद्धास्थान असलेल्या गणपतीपुळे येथे यंदाच्या उन्हाळी हंगामात मंगळवार, दि. ५ मे रोजी अंगारकी चतुर्थी यात्रा उत्सवाचा सुवर्णयोग जुळून आला आहे. या पार्श्वभूमीवर संस्थान श्री देव गणपतीपुळे आणि जिल्हा प्रशासनाच्या वतीने भाविकांच्या सुलभ दर्शनासाठी चोख नियोजन करण्यात आले आहे.
पहाटे ३:३० वाजता उघडणार मंदिराचे दरवाजे
अंगारकी चतुर्थीनिमित्त भाविकांची होणारी अभूतपूर्व गर्दी लक्षात घेऊन, देवस्थानने दर्शनाच्या वेळेत बदल केला आहे. पहाटे साडेतीन वाजता स्वयंभू श्रींचे मंदिर दर्शनासाठी खुले होईल. मुख्य पुजाऱ्यांच्या हस्ते विधीवत पूजा, मंत्रपुष्पांजली आणि आरती झाल्यानंतर भाविकांना मंदिरात प्रवेश दिला जाणार आहे.
कडक पोलीस बंदोबस्त आणि चोख व्यवस्था
गर्दीवर नियंत्रण मिळवण्यासाठी रत्नागिरी जिल्हा पोलीस दलाचे १७ अधिकारी आणि सुमारे १५० पोलीस कर्मचारी तैनात करण्यात आले आहेत. प्रांताधिकारी जीवन देसाई आणि पोलीस निरीक्षक संजय पाटील यांच्या मार्गदर्शनाखाली विशेष नियोजन बैठक पार पडली असून, खालील सुविधा पुरवण्यात येणार आहेत:
- दर्शन रांगा: उन्हाचा तडाखा लक्षात घेता रांगेत छप्पर (शेड) आणि पिण्याच्या पाण्याची व्यवस्था.
- स्वयंसेवक: श्री अनिरुद्ध बापू उपासना ट्रस्टचे स्वयंसेवक आणि देवस्थानचे रक्षक सुरक्षेसाठी सज्ज.
- वाहतूक नियोजन: पर्यटकांच्या वाहनांसाठी स्वतंत्र पार्किंग व्यवस्था करण्यात आली आहे.
घाटमाथ्यावरून भाविकांची मोठी हजेरी
यंदा उन्हाळी सुट्ट्या आणि अंगारकीचा योग एकत्र आल्याने कोल्हापूर, सांगली, सातारा, इचलकरंजी, कराड, मिरज आणि कवठेमहाकाळ या भागांतून मोठ्या संख्येने भाविक दाखल होणार आहेत. एकूण ६० ते ७० हजार भाविक दर्शनासाठी येतील असा प्राथमिक अंदाज वर्तवण्यात आला आहे.
आरोग्य सेवा सज्ज: भाविक किंवा पर्यटकांना आरोग्याचा काही त्रास झाल्यास तातडीच्या उपचारासाठी देवस्थानची रुग्णवाहिका २४ तास तैनात असणार आहे.
समुद्रकिनाऱ्यावर जीवरक्षक तैनात
उन्हाळ्यामुळे अनेक पर्यटक समुद्रस्नानाचा आनंद घेतात. कोणतीही दुर्घटना टाळण्यासाठी गणपतीपुळे ग्रामपंचायतीचे ६ जीवरक्षक आणि पोलीस पथक किनाऱ्यावर सतत गस्त घालणार आहेत. पर्यटकांनी प्रशासनाच्या सूचनांचे पालन करावे, असे आवाहन करण्यात आले आहे.
सायंकाळी निघणार भव्य पालखी मिरवणूक
अंगारकी चतुर्थीचा मुख्य सोहळा म्हणजे सायंकाळी साडेचार वाजता निघणारी स्वयंभू श्रींची पालखी मिरवणूक. ढोल-ताशांच्या गजरात, फटाक्यांच्या आतषबाजीत आणि ‘मंगलमूर्ती मोरया’च्या जयघोषात ही पालखी मंदिर प्रदक्षिणा मार्गावरून मार्गस्थ होईल. यात देवस्थानचे पंचमंडळी, पुजारी, स्थानिक ग्रामस्थ आणि पर्यटक मोठ्या उत्साहाने सहभागी होणार आहेत.
व्यापाऱ्यांमध्ये आनंदाचे वातावरण
या यात्रोत्सवासाठी घाटमाथ्यावरून अनेक दुकानदार गणपतीपुळे येथे दाखल झाले आहेत. भाविकांना दर्शनासोबतच विविध वस्तूंच्या खरेदीचा आनंदही लुटता येणार आहे, ज्यामुळे स्थानिक बाजारपेठेत मोठी उलाढाल होण्याची शक्यता आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:22 05-05-2026
