मत्स्यसंपदा संवर्धनाला प्राधान्य; मच्छीमार सहकारी संस्थांची जुनी मागणी पूर्ण
रत्नागिरी: ‘Fishing Ban Maharashtra’ संदर्भात राज्य शासनाने सागरी मत्स्य व्यवसायासाठी एक अत्यंत महत्त्वपूर्ण आणि मोठा निर्णय घेतला आहे. राज्यातील पावसाळी मासेमारी बंदीचा कालावधी आता थेट १५ ऑगस्टपर्यंत वाढवण्याची घोषणा मत्स्यव्यवसाय व बंदर विकास मंत्री नितेश राणे यांनी सोमवारी विधानसभेत केली. या नव्या निर्णयामुळे यापुढे दरवर्षी १ जून ते १५ ऑगस्ट या कालावधीत राज्याच्या सागरी हद्दीत यांत्रिक व यंत्रचलित मासेमारी नौकांना पूर्णपणे बंदी राहणार आहे.
६१ दिवसांवरून कालावधीत वाढ
सध्या राज्यात केंद्र आणि राज्य शासनाच्या विद्यमान नियमांनुसार १ जून ते ३१ जुलै असा ६१ दिवसांचा पावसाळी मासेमारी बंदी कालावधी लागू आहे. मात्र, माशांच्या प्रजनन काळात मोठ्या प्रमाणावर होणारी लहान माशांची मासेमारी रोखण्यासाठी आणि समुद्रातील माशांचा साठा टिकवून ठेवण्यासाठी हा कालावधी १५ ऑगस्टपर्यंत वाढवण्याची मागणी मच्छीमार सहकारी संस्थांकडून अनेक वर्षांपासून सातत्याने केली जात होती. ती मागणी लक्षात घेऊन शासनाने हा धोरणात्मक निर्णय घेतला आहे.
अनधिकृत मासेमारी करणाऱ्यांवर कठोर कारवाई
मासेमारी बंदीचा कालावधी वाढवला असतानाच परराज्यातील नौकांवर शासनाची करडी नजर असणार आहे. राज्यात बंदी लागू असताना इतर राज्यांतील मासेमारी नौका महाराष्ट्राच्या किनारपट्टीवर येऊन अनधिकृतपणे मासेमारी करत असल्यास त्यांच्याविरुद्ध मत्स्य विभागाकडून अत्यंत कठोर कायदेशीर कारवाई करण्यात येईल, असा इशाराही मंत्री नितेश राणे यांनी या वेळी दिला.
मत्स्यसंपदा आणि जीविताचे रक्षण
या निर्णयामुळे माशांच्या प्रजननासाठी आवश्यक असलेला कालावधी अधिक सुरक्षित होणार असून, समुद्रातील नैसर्गिक मत्स्यसंपदा वाढण्यास मोठी मदत होणार आहे. यासोबतच, पावसाळ्यातील अत्यंत प्रतिकूल आणि वादळी हवामानात समुद्रात जाणाऱ्या स्थानिक मच्छीमारांच्या जीवितालाही या वाढीव बंदीमुळे मोठे संरक्षण मिळणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:50 30-06-2026
