राजापूर: राजापूर तालुक्याच्या पूर्व भागात बिबट्याचा वावर पुन्हा एकदा वाढल्याचे समोर आले आहे. तालुक्यातील पांगरी गावात रविवारी सायंकाळी बिबट्याने शेळ्यांच्या कळपावर अचानक हल्ला करत एक शेळी ठार केल्याची खळबळजनक घटना घडली आहे. या हिंस्त्र हल्ल्यामुळे पांगरी आणि आसपासच्या परिसरात तीव्र भीतीचे वातावरण निर्माण झाले असून वन विभागाने तातडीने बंदोबस्त करावा, अशी मागणी जोर धरू लागली आहे.
कळपावर अचानक झडप; शेळीला ओढत नेले
मिळालेल्या माहितीनुसार, पांगरी येथील शेतकरी लक्ष्मण सोनू चौगुले हे रविवारी सायंकाळी आपला शेळीचा कळप घेऊन घराच्या दिशेने परतत होते. त्याच वेळी दबा धरून बसलेल्या बिबट्याने अचानक शेळ्यांच्या कळपावर झडप घातली. क्षणाधार्त बिबट्याने एका शेळीला जबड्यात पकडले आणि जवळच असलेल्या ओढ्याच्या दिशेने पळ काढला. या अनपेक्षित हल्ल्यामुळे कळपातील इतर शेळ्या घाबरून सैरावैरा पळाल्या.
झाडीत आढळला मृतदेह; १५ ते २० हजारांचे नुकसान
बिबट्या पसार झाल्यानंतर लक्ष्मण चौगुले आणि त्यांच्या मुलाने तात्काळ शेळीचा शोध सुरू केला. ओढ्यापासून काही अंतरावर असलेल्या घनदाट झाडीत शोध घेतला असता, त्यांना शेळी मृत अवस्थेत आढळून आली. बिबट्याने शेळीचा मोठा भाग फस्त केला होता. या हल्ल्यात चौगुले यांचे सुमारे १५ ते २० हजार रुपयांचे आर्थिक नुकसान झाले आहे.
वन विभागाकडे पिंजरा लावण्याची मागणी
या घटनेनंतर पांगरी परिसरात शेतकरी आणि ग्रामस्थांमध्ये कमालीची दहशत पसरली आहे. संध्याकाळच्या वेळी शेतात जाणे किंवा जनावरांना चरण्यासाठी नेणे आता धोक्याचे बनले आहे.
ग्रामस्थांच्या प्रमुख मागण्या:
- वन विभागाने या घटनेची तातडीने दखल घेऊन पीडित शेतकऱ्याला योग्य ती नुकसानभरपाई द्यावी.
- परिसरात बिबट्याचा वावर वाढल्याने त्याला जेरबंद करण्यासाठी त्वरित पिंजरा लावून बंदोबस्त करावा.
सध्या परिसरात बिबट्याच्या हालचाली वाढल्याचे स्पष्ट होत असल्याने, वन विभागाने नागरिकांना सतर्क राहण्याचे आणि संध्याकाळनंतर एकटे बाहेर न पडण्याचे आवाहन केले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
15:02 05-05-2026
