ठाकरे सेना विभागप्रमुख साहिल पवार यांचे राष्ट्रीय महामार्ग विभागाला निवेदन; सुरक्षा उपायांकडे वेधले लक्ष
चिपलूण: पावसाळ्याला सुरुवात झाली असली तरी राष्ट्रीय महामार्ग विभागाकडून मुंबई-गोवा महामार्गावरील पाणी निचरा होण्याची कोणतीही ठोस कामे अद्याप झालेली नाहीत. त्यामुळे पावसाचे पाणी रस्त्यावर साचून प्रवासी आणि स्थानिक नागरिकांच्या अडचणींमध्ये कमालीची वाढ झाली आहे. या गंभीर पार्श्वभूमीवर ठाकरे सेनेचे चिपलूण शहर विभाग प्रमुख साहिल पवार यांनी राष्ट्रीय महामार्ग विभागाला एक सविस्तर निवेदन दिले असून, महामार्गावर तात्काळ सुरक्षात्मक उपाययोजना करण्याची मागणी केली आहे. महामार्गावरील अपूर्ण कामांमुळे सध्या वाहनचालक आणि पादचाऱ्यांना जीव मुठीत धरून प्रवास करावा लागत आहे.
शाळा-महाविद्यालयीन विद्यार्थी आणि ज्येष्ठ नागरिकांची सुरक्षा धोक्यात
विभाग प्रमुख साहिल पवार यांनी दिलेल्या निवेदनानुसार, चिपलूण शहरातील रॉयल नगर परिसरातून दररोज मोठ्या संख्येने शाळा व महाविद्यालयातील विद्यार्थ्यांची ये-जा सुरू असते. महामार्गाच्या सद्यस्थितीमुळे या विद्यार्थ्यांसह पायी प्रवास करणारे ज्येष्ठ नागरिक आणि दुचाकी चालक यांना मोठा त्रास सहन करावा लागत आहे. महामार्गावर ठिकठिकाणी पडलेले खड्डे आणि पावसाचे साचणारे पाणी यामुळे अपघातांचा धोका वाढला असून प्रशासनाने याकडे गांभीर्याने लक्ष देणे गरजेचे आहे.
फेडरल बँकेसमोरील धोकादायक खोदकाम आणि संरक्षक कठड्यांचा अभाव
शहरातील फेडरल बँकेसमोरील भागात महामार्गाचे मोठे खोदकाम करून ठेवण्यात आले आहे. या खोदकामाच्या बाजूने कोणतीही संरक्षक जाळी अथवा कठडे लावण्यात आलेले नाहीत. मुसळधार पावसात किंवा रात्रीच्या वेळी अंदाज न आल्यास येथे भीषण अपघात होण्याची शक्यता नाकारता येत नाही. त्यामुळे या भागात तातडीने संरक्षक कठडे उभारावेत, अशी मागणी निवेदनात करण्यात आली आहे. तसेच रात्रीच्या वेळी चालकांना रस्त्याचा आणि वळणांचा योग्य अंदाज यावा, यासाठी दिशादर्शक आणि चेतावणी देणारे फलक (रेफ्लेक्टर) लावणे गरजेचे आहे.
पंचायत समितीसमोरील मातीचे ढिगारे हटवण्याची मागणी; चिखलाचे साम्राज्य पसरण्याची भीती
महामार्गाच्या कामांतर्गत चिपलूण पंचायत समिती कार्यालयासमोर मातीचे मोठे ढिगारे टाकण्यात आले आहेत. पावसाचा जोर वाढल्यास ही माती वाहून थेट मुख्य रस्त्यावर पसरण्याची आणि त्यामुळे मोठ्या प्रमाणावर चिखल होण्याची दाट शक्यता आहे. हा चिखल दुचाकी व इतर वाहनांसाठी अत्यंत घसरडा ठरू शकतो. त्यामुळे हे मातीचे ढिगारे महामार्गावरून तातडीने हटवावेत, अन्यथा तीव्र परिणामांना सामोरे जावे लागेल, असा इशारा स्थानिक प्रशासनाला देण्यात आला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:20 27-06-2026
