चिपळूण/रत्नागिरी: रत्नागिरी जिल्ह्यातील संगमेश्वर तालुक्यातील मौजे मार्गताम्हाने येथे २०१३ साली घडलेल्या गाजलेल्या पालखी वादाच्या प्रकरणातून चिपळूण येथील जिल्हा व सत्र न्यायालयाने सर्व ३५ आरोपींची ससन्मान निर्दोष मुक्तता केली आहे. पद्मावती देवीच्या पालखीवरून दोन समाजांत निर्माण झालेला वाद आणि त्यानंतर दाखल झालेल्या ॲट्रोसिटी प्रकरणात पुराव्यांअभावी हा निकाल लागला आहे.
जिल्हा व सत्र न्यायाधीश डॉ. अनिता नेवसे यांनी या खटल्याचा निकाल दिला. या निर्णयामुळे मार्गताम्हाने परिसरातील संबधित ३५ कुटुंबांना तब्बल ११ वर्षांनंतर मोठा दिलासा मिळाला आहे.
काय होते नेमके प्रकरण?
ही घटना २३ मार्च २०१३ रोजी घडली होती. मार्गताम्हाने येथील पद्मावती देवीच्या पालखीवरून मराठा समाज आणि चर्मकार समाज यांच्यात वाद निर्माण झाला होता. हा वाद सामोपचाराने मिटवण्यासाठी ग्रामपंचायत कार्यालयात एक महत्त्वाची बैठक आयोजित करण्यात आली होती. या बैठकीला तत्कालीन डीवायएसपी (DySP), चिपळूणचे वरिष्ठ पोलीस अधिकारी, तहसीलदार आणि प्रांत अधिकारी देखील उपस्थित होते.
त्या दिवशी ग्रामपंचायत कार्यालयाबाहेर आरोपींनी फिर्यादींना जातीवाचक शिवीगाळ केल्याचा आरोप करत गुन्हा दाखल करण्यात आला होता. या प्रकरणी पोलिसांनी ३५ जणांविरुद्ध अनुसूचित जाती आणि अनुसूचित जमाती अत्याचार प्रतिबंधक कायद्यान्वये (ॲट्रोसिटी) गुन्हा नोंदवला होता.
साक्षीदारांच्या जबाबातील विसंगती ठरली महत्त्वाची
या प्रकरणाच्या सुनावणीदरम्यान सरकारी पक्षातर्फे एकूण १० साक्षीदारांची साक्ष नोंदवण्यात आली. मात्र, न्यायालयाने खालील बाबींची गंभीर दखल घेतली:
- विसंगत जबाब: साक्षीदारांनी दिलेल्या जबाबांमध्ये मोठ्या प्रमाणावर तफावत आणि विसंगती दिसून आली.
- परिस्थितीजन्य पुरावे: ज्या दिवशी हा वाद झाला, त्या दिवशी बैठकीसाठी मोठे प्रशासकीय अधिकारी आणि मोठा पोलीस बंदोबस्त तैनात होता. अशा परिस्थितीत शिवीगाळ होणे शक्य नसल्याची बाजू बचाव पक्षाने मांडली.
- उलटतपासणी: उलटतपासणी दरम्यान समोर आलेल्या बाबींमुळे आरोपींविरुद्धचा गुन्हा सिद्ध होऊ शकला नाही.
बचाव पक्षाचा युक्तिवाद
आरोपींच्या वतीने चिपळूण येथील ज्येष्ठ विधिज्ञ ॲड. नितीन केळकर यांनी प्रभावीपणे बाजू मांडली. त्यांना ॲड. सोहम भोजने आणि ॲड. अनिश केळकर यांनी कायदेशीर सहकार्य केले. पुराव्यांमधील त्रुटी आणि साक्षीदारांमधील विसंगती न्यायालयाच्या निदर्शनास आणून दिल्याने न्यायालयाने सर्व ३५ जणांची निर्दोष मुक्तता केली.
शांतता राखण्याचे प्रशासनाचे प्रयत्न
२०१३ मध्ये हा वाद विकोपाला गेला असताना प्रशासनाने चोख बंदोबस्त ठेवून परिस्थिती नियंत्रणात ठेवली होती. तत्कालीन बैठकीतही वाद मिटवण्याचा प्रयत्न झाला होता. आता न्यायालयाने दिलेल्या या निकालामुळे अनेक वर्षांपासून प्रलंबित असलेल्या या प्रकरणावर पडदा पडला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:18 07-05-2026
