रत्नागिरी: मे महिन्याच्या सुट्ट्यांमुळे कोकणात येणाऱ्या चाकरमान्यांची आणि पर्यटकांची संख्या प्रचंड वाढली आहे. मात्र, या वाढत्या गर्दीचा मोठा ताण जिल्ह्यातील सीएनजी (CNG) पंपांवर पडत असून, इंधनासाठी वाहनचालकांना तासनतास रांगेत उभे राहावे लागत आहे. रणरणत्या उन्हात ताटकळत उभे राहिल्याने प्रवासी आणि स्थानिक रिक्षाचालक पूर्णपणे हैराण झाले आहेत.
महामार्गावरील पंपांवर वाहनांच्या रांगाच रांगा
मुंबई-गोवा महामार्गावरील खेड, चिपळूण, संगमेश्वर, रत्नागिरी, लांजा आणि राजापूर येथील सीएनजी पंपांवर वाहनांच्या लांबच लांब रांगा लागल्याचे चित्र दिसत आहे. सिंधुदुर्गात जाणारे चाकरमानी आणि गोव्याला जाणाऱ्या पर्यटकांच्या चारचाकी वाहनांमुळे पंपांवर मोठी गर्दी होत आहे. अनेक ठिकाणी साठा संपल्यानंतरही, रिफिलिंग गाड्या येईपर्यंत वाहनचालक आपला नंबर लावून रांगेत उभे राहत आहेत.
स्थानिक रिक्षाचालकांना बसतोय मोठा फटका
केवळ पर्यटकांनाच नाही, तर चिपळूण, खेड, रत्नागिरी आणि दापोली शहरातील स्थानिक रिक्षाचालकांनाही या समस्येचा मोठा सामना करावा लागत आहे. व्यवसाय करण्याऐवजी रिक्षाचालकांचा जास्तीत जास्त वेळ सीएनजीसाठी रांगेतच जात आहे. यामुळे रिक्षा व्यवसायावर परिणाम होत असून रिक्षाचालकांमध्ये संतापाचे वातावरण आहे.
तुटवड्याचे मुख्य कारण काय?
जिल्ह्यात सीएनजीचा तुटवडा निर्माण होण्यामागे पुरवठा साखळीतील मर्यादा कारणीभूत असल्याचे सांगितले जात आहे.
- एकच ऑनलाईन पंप: संपूर्ण जिल्ह्यात केवळ संगमेश्वर-डिंगणी येथेच ऑनलाईन पंप उपलब्ध आहे.
- रिफिलिंगचा ताण: जिल्ह्यातील इतर सर्व पंपांवरील रिफिलिंग गाड्यांना याच एका ठिकाणी जाऊन गॅस भरावा लागतो.
- फेऱ्यांमध्ये वाढ: मागणी जास्त आणि साठा मर्यादित असल्याने गाड्यांना वारंवार डिंगणी येथे फेऱ्या माराव्या लागत आहेत, ज्यामुळे वितरणात विलंब होत आहे.
वाहनचालकांचे हाल
सध्या रत्नागिरी जिल्ह्यात उन्हाचा तडाखा मोठ्या प्रमाणावर आहे. अशा परिस्थितीत सावली नसलेल्या ठिकाणी तासनतास उभे राहून गॅस भरावा लागत असल्याने वाहनचालक शारीरिक आणि मानसिकदृष्ट्या थकले आहेत. प्रशासनाने किंवा संबंधित कंपन्यांनी सीएनजीचा पुरवठा सुरळीत करण्यासाठी तातडीने उपाययोजना कराव्या, अशी मागणी आता जोर धरू लागली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
09:29 08-05-2026
