खेड (प्रतिनिधी): राजकीय आणि सामाजिक वादातून एका व्यक्तीला अडकवण्यासाठी रचलेला विनयभंगाचा बनाव अखेर न्यायालयाच्या चौकटीत उघड झाला आहे. खेड येथील अतिरिक्त जिल्हा सत्र न्यायालयाने किरण संजय तायडे यांची विनयभंगाच्या आरोपातून सन्मानपूर्वक निर्दोष मुक्तता केली आहे. तायडे यांच्या बाजूने करण्यात आलेला युक्तीवाद आणि समोर आलेले पुरावे पाहता, ही तक्रार केवळ सूडबुद्धीने करण्यात आल्याचे सिद्ध झाले आहे.
नेमके प्रकरण काय?
मिळालेल्या माहितीनुसार, किरण संजय तायडे यांचा काही लोकांसोबत राजकीय आणि सामाजिक मुद्द्यांवरून वाद होता. या वादातूनच काही दिवसांपूर्वी त्यांच्या कार्यालयावर हल्ला करण्यात आला होता. या हल्ल्यादरम्यान तायडे यांना जातीवाचक शिवीगाळ करत मारहाणही झाली होती. याप्रकरणी तायडे यांनी पोलिसांत रीतसर तक्रार दाखल केली होती.
दबावाचे राजकारण आणि खोटी तक्रार
तायडे यांनी केलेली ही तक्रार मागे घेण्यासाठी त्यांच्यावर आणि त्यांच्या कुटुंबीयांवर सातत्याने दबाव टाकण्यात येत होता. मात्र, तायडे यांनी कायदेशीर लढा सुरूच ठेवण्याचा पवित्रा घेतल्याने, त्यांना जेरीस आणण्यासाठी अखेर त्यांच्यावर ‘विनयभंगाचा’ खोटा गुन्हा दाखल करण्यात आला होता. समाजात बदनामी करण्याच्या उद्देशाने हे षडयंत्र रचले गेले होते.
न्यायालयाचा निकाल आणि युक्तीवाद
अतिरिक्त जिल्हा सत्र न्यायालयात या प्रकरणाची सुनावणी पार पडली. किरण तायडे यांच्या वतीने ॲड. साबळे आणि ॲड. जयेश जाधव यांनी प्रभावीपणे बाजू मांडली. त्यांनी न्यायालयाच्या निदर्शनास आणून दिले की:
- तायडे यांनी हल्ल्याची तक्रार मागे न घेतल्यानेच हा खोटा गुन्हा दाखल करण्यात आला.
- फिर्यादी महिलेला विनयभंगाची तक्रार देण्यास काही हितसंबंधी लोकांनी भाग पाडले होते.
- गुन्ह्यातील विसंगती आणि राजकीय द्वेष यामुळे हे प्रकरण संशयास्पद आहे.
दोन्ही बाजूंचा युक्तीवाद आणि सादर केलेले पुरावे ग्राह्य धरून, न्यायालयाने किरण तायडे यांच्यावरील सर्व आरोप फेटाळून लावले आणि त्यांची निर्दोष मुक्तता करण्याचे आदेश दिले.
सत्याचा विजय
या निकालामुळे खोट्या गुन्ह्यात अडकवणाऱ्या प्रवृत्तींना चपराक बसली असल्याची चर्चा परिसरात सुरू आहे. “न्यायव्यवस्थेवर माझा पूर्ण विश्वास होता आणि आज सत्याचा विजय झाला आहे,” अशी भावना निर्दोष मुक्ततेनंतर किरण तायडे यांनी व्यक्त केली.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:41 09-05-2026
