रत्नागिरी जिल्ह्यात गेल्या दोन दिवसांपासून होत असलेल्या वळवाच्या पावसामुळे मोठे नुकसान झाले आहे. या अवकाळी पावसामुळे घरांच्या पडझडीसोबतच सार्वजनिक मालमत्तेचेही नुकसान झाले असून, जिल्ह्यातील तीन शाळांना याचा मोठा फटका बसला आहे. दरम्यान, १६ जूनपासून शाळा सुरू होणार असून त्यापूर्वीच या शाळांची दुरुस्ती केली जाईल, अशी माहिती प्रभारी प्राथमिक शिक्षणाधिकारी सुनीता शिरभाते यांनी दिली आहे.
लांजा आणि चिपळूणमध्ये शाळांचे नुकसान
जिल्ह्यात झालेल्या मुसळधार पावसामुळे लांजा तालुक्यातील दोन आणि चिपळूण तालुक्यातील एका शाळेचे नुकसान झाले आहे. पावसाच्या जोरामुळे शाळांवरील छप्पर उडाले असून, कौले फुटली आहेत. तसेच अनेक शाळांच्या खिडक्यांचेही नुकसान झाले आहे. शिक्षण विभागाने या नुकसानीची दखल घेतली असून, संबंधित शाळांकडून दुरुस्तीचे प्रस्ताव प्राप्त होताच युद्धपातळीवर काम सुरू करण्यात येणार आहे.
१ कोटी ६९ लाखांचा निधी मंजूर; ७६ शाळांचा कायापालट होणार
रत्नागिरी जिल्ह्यातील जिल्हा परिषदेच्या अनेक शाळांची इमारत सद्यस्थितीत मोडकळीस आली आहे. या पार्श्वभूमीवर जिल्हा परिषद प्रशासनाने ७६ शाळांच्या दुरुस्तीचा निर्णय घेतला आहे. यासाठी जिल्हा नियोजन समितीकडून १ कोटी ६९ लाख ९८ हजार रुपयांचा निधी मंजूर करण्यात आला आहे. पावसाळा आणि शाळा सुरू होण्याची तारीख लक्षात घेता, १५ जूनपर्यंत ही कामे पूर्ण करण्याचे उद्दिष्ट ठेवण्यात आले आहे.
याव्यतिरिक्त, जर इतर शाळांकडूनही दुरुस्तीचे प्रस्ताव प्राप्त झाले, तर त्यांनाही निधी उपलब्ध करून देऊन दुरुस्ती केली जाईल, असे शिक्षण विभागाकडून स्पष्ट करण्यात आले आहे.
शिक्षण विभागाची तयारी जोरात
सध्या दहावी आणि बारावीचे निकाल जाहीर झाले असून विद्यार्थ्यांना उन्हाळी सुट्ट्या सुरू आहेत. १६ जूनपासून नवीन शैक्षणिक वर्षाला सुरुवात होत आहे. विद्यार्थ्यांच्या स्वागतासाठी शाळा सज्ज करण्याच्या सूचना देण्यात आल्या आहेत. पावसामुळे झालेल्या नुकसानीचा शैक्षणिक वर्षाच्या सुरुवातीला फटका बसू नये, यासाठी शिक्षण विभागाने आतापासूनच नियोजनाला सुरुवात केली आहे.
