संगमेश्वर (रत्नागिरी): रत्नागिरी जिल्ह्याच्या इतिहासात प्रथमच एक अभूतपूर्व आणि अभिमानास्पद घटना घडली आहे. ३६९ व्या छत्रपती संभाजी महाराज जयंतीचे औचित्य साधून, संगमेश्वर-कसबा येथील महाराजांच्या स्मारकास रत्नागिरी पोलीस दलाच्या बँड पथकाद्वारे शासकीय मानवंदना देण्यात आली. पोलीस दलातर्फे अशा प्रकारे मानवंदना देण्याची ही जिल्ह्यातील पहिलीच वेळ असून, या ऐतिहासिक सोहळ्याने शिव-शंभू प्रेमींमध्ये आनंदाचे वातावरण आहे.
पोलीस अधीक्षकांच्या हस्ते पुष्पहार अर्पण
१४ मे २०२६ रोजी पार पडलेल्या या सोहळ्यात रत्नागिरीचे पोलीस अधीक्षक मा. श्री. नितीन बगाटे (भा.पो.से.) यांच्या हस्ते छत्रपती संभाजी महाराजांच्या स्मारकास पुष्पहार अर्पण करून औपचारिक अभिवादन करण्यात आले. त्यानंतर पोलीस बँड पथकाने अत्यंत शिस्तबद्ध पद्धतीने मानवंदना सादर केली. संभाजी महाराजांच्या अजोड शौर्याला, पराक्रमाला आणि स्वराज्य रक्षणाच्या विचारांना ही आगळीवेगळी आदरांजली वाहण्यात आली.
जिल्ह्यात प्रथमच ऐतिहासिक सोहळा
साधारणपणे जयंती उत्सवांमध्ये विविध सामाजिक संस्थांकडून अभिवादन केले जाते, मात्र यंदा रत्नागिरी पोलीस दलाने पुढाकार घेऊन बँड पथकासह मानवंदना दिल्याने या कार्यक्रमाला एक विशेष राजशिष्टाचार आणि गौरव प्राप्त झाला. ही संकल्पना पोलीस अधीक्षक नितीन बगाटे यांची असून, यामुळे पोलीस प्रशासन आणि नागरिक यांच्यातील नाते अधिक दृढ होण्यास मदत झाली आहे.
वरिष्ठ अधिकारी व नागरिकांची मोठी उपस्थिती
या ऐतिहासिक प्रसंगी अपर पोलीस अधीक्षक श्री. बी. बी. महामुनी यांच्यासह जिल्ह्यातील विविध पोलीस अधिकारी, अंमलदार आणि पोलीस बँड पथक उपस्थित होते. आपल्या लाडक्या राजाला पोलीस दलाकडून मानवंदना दिली जात असल्याचे पाहण्यासाठी कसबा परिसरातील नागरिक आणि शिवभक्तांनी मोठी गर्दी केली होती.
छत्रपती संभाजी महाराजांच्या बलिदान भूमीवर झालेला हा शासकीय गौरव सोहळा रत्नागिरी जिल्ह्याच्या शिरपेचात मानाचा तुरा रोवणारा ठरला आहे.
