पटसंख्या आणि शिक्षक समायोजन प्रक्रियेतून ६१ शाळांना दिलासा; ३५ शून्य शिक्षकी शाळांमधील विद्यार्थ्यांचे शेजारच्या विद्यालयात वर्ग
रत्नागिरी: Ratnagiri School Adjustment म्हणजेच रत्नागिरी जिल्ह्यातील शिक्षकांचे समायोजन आणि पटसंख्ये अभावी बंद होण्याच्या मार्गावर असलेल्या शाळांना अखेर मोठा दिलासा मिळाला आहे. जिल्ह्यातील तब्बल ९९ शाळा बंद होण्याच्या स्थितीत होत्या; मात्र रत्नागिरी जिल्ह्याचे पालकमंत्री उदय सामंत यांच्या विशेष प्रयत्नांमुळे आणि हस्तक्षेपामुळे जिल्ह्यातील ६१ माध्यमिक शाळा शून्य शिक्षकी होण्यापासून वाचवण्यात प्रशासनाला यश आले आहे. या निर्णयामुळे ग्रामीण भागातील शेकडो विद्यार्थ्यांना मोठा दिलासा मिळाला असून त्यांचे शैक्षणिक नुकसान टळले आहे. दुसरीकडे, अत्यंत कमी पटसंख्येमुळे जिल्ह्यातील ३५ शाळा शून्य शिक्षकी झाल्या असून तेथील विद्यार्थ्यांची सोय शेजारच्या शाळांमध्ये करण्यात आली आहे.
पालकमंत्री उदय सामंत यांच्या बैठकीनंतर समायोजन प्रक्रिया रद्द
रत्नागिरी जिल्ह्यातील १०५ अतिरिक्त शिक्षकांचे थेट समायोजन करण्यात आले असते, तर जिल्ह्यातील तब्बल ९९ शाळा एकाच वेळी शून्य शिक्षकी झाल्या असत्या. ही गंभीर परिस्थिती लक्षात घेऊन पालकमंत्री उदय सामंत यांनी तातडीने पावले उचलली आणि ही समायोजन प्रक्रिया रद्द करण्याचे निर्देश दिले. यासंदर्भात मंत्रालयात एक विशेष बैठक पार पडली. कोकणातील भौगोलिक परिस्थिती आणि दुर्गमता लक्षात घेता येथील शाळा वाचवण्यासाठी कडक नियम लावू नयेत, अशी आग्रही भूमिका लोकप्रतिनिधींनी मांडली होती.
२० पटसंख्येच्या अटीनुसार ६१ शाळांना जीवदान
मंत्रालयातील बैठकीच्या इतिवृत्तानुसार, शाळा टिकवण्यासाठी किमान २० पटसंख्येची अट ठेवण्यात आली होती. या बदललेल्या नियमानुसार अतिरिक्त शिक्षकांचे नुकतेच पुनर्समायोजन करण्यात आले. या नवीन प्रक्रियेचा थेट फायदा रत्नागिरी जिल्ह्यातील ६१ शाळांना झाला असून या शाळा आता पूर्ण क्षमतेने सुरू राहणार आहेत. त्यामुळे स्थानिक विद्यार्थ्यांना स्वतःच्या गावातच माध्यमिक शिक्षणाची सुविधा कायम उपलब्ध राहणार आहे.
३५ शाळा शून्य शिक्षकी; विद्यार्थ्यांचे जवळच्या शाळांमध्ये स्थलांतर
शासनाने शिथिल केलेल्या नियमांनंतरही जिल्ह्यातील ३५ शाळा अखेर शून्य शिक्षकी झाल्या आहेत. मात्र, या शाळांमधील एकाही विद्यार्थ्याचे शैक्षणिक नुकसान होऊ दिले जाणार नाही, अशी ग्वाही प्रशासनाने दिली आहे. शून्य शिक्षकी झालेल्या शाळांमधील सर्व विद्यार्थ्यांचे त्यांच्या घराजवळील इतर दुसऱ्या शाळांमध्ये सुरक्षितपणे वर्ग (समायोजन) करण्यात आले आहे.
तालुक्यातील शून्य शिक्षकी झालेल्या शाळांची आकडेवारी
जिल्ह्यात कमी पटसंख्येमुळे ज्या ३५ शाळांमध्ये एकही शिक्षक उपलब्ध होऊ शकला नाही, त्यांची तालुकावार अधिकृत आकडेवारी खालीलप्रमाणे आहे:
- चिपळूण: ०८ शाळा
- संगमेश्वर: ०८ शाळा
- राजापूर: ०५ शाळा
- खेड: ०३ शाळा
- रत्नागिरी: ०३ शाळा
- दापोली: ०२ शाळा
- मंडणगड: ०२ शाळा
- गुहागर: ०२ शाळा
एकंदरीत, पालकमंत्री उदय सामंत यांच्या सकारात्मक आणि विकासाभिमुख भूमिकेमुळे जिल्ह्यातील ६१ शाळांचे अस्तित्व टिकून राहिले असून, शिक्षण क्षेत्रातून या निर्णयाचे स्वागत होत आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:58 18-06-2026
