धरण साठ्यातील पाणी पातळी घटल्याने नगरपंचायतीचा मोठा निर्णय; पाणी जपून वापरण्याचे आवाहन
देवरुख: यंदा १५ जून उलटून गेली तरी मान्सूनचे आगमन लांबणीवर पडल्याने देवरुखकरांवर पाणीकपातीचे मोठे संकट ओढवले आहे. वाढत्या उष्णतेचा थेट परिणाम पाणीसाठ्यावर झाला असून धरण साठ्यातील पाणी पातळी झपाट्याने खालावत आहे. या पार्श्वभूमीवर देवरुख नगरपंचायतीने खबरदारीचा उपाय म्हणून एक मोठा निर्णय घेतला असून, १८ जूनपासून शहरात एक दिवसाआड पाणीपुरवठा करण्याची घोषणा प्रशासनाने केली आहे.
भविष्यकालीन टंचाई टाळण्यासाठी घेतला निर्णय
प्रशासनाने धरणातील पाणी साठ्याचा सविस्तर आढावा घेतला असता, पिण्याच्या पाण्याचा साठा अत्यंत मर्यादित असल्याचे समोर आले आहे. भविष्यात तीव्र पाणीटंचाईचे संकट निर्माण होऊ नये, यासाठी नगरपंचायतीला हा निर्णय घ्यावा लागत आहे. चोख आणि दूरदृष्टी नियोजनामुळे यंदाचा कडक उन्हाळा संपूनही देवरुखकरांना जूनच्या मध्यापर्यंत पाणीटंचाई जाणवली नव्हती. मात्र, आता पावसाने दडी मारल्यामुळे निर्माण झालेल्या परिस्थितीवर मात करण्यासाठी तूर्तास हा कपात निर्णय लागू करण्यात येत आहे. नवीन वेळापत्रकानुसार नेहमीच्या वेळेप्रमाणेच पाणीपुरवठा होईल, मात्र तो एक दिवसाआड असेल.
प्रशासनाचे नागरिकांना कडक निर्देश आणि आवाहन
पाण्याच्या या टंचाईच्या काळात नागरिकांनी पाण्याचा अत्यंत जपून आणि काटकसरीने वापर करावा, असे आवाहन देवरुख नगरपंचायतीकडून करण्यात आले आहे. या संदर्भातील सूचना शहरात प्रसारमाध्यमे आणि घंटागाडीद्वारे जाहीर केल्या जाणार आहेत. प्रशासनाने नागरिकांसाठी खालील कडक निर्देश जारी केले आहेत:
- नळाचे पाणी वाहने धुण्यासाठी वापरू नये.
- बांधकाम कामांसाठी पिण्याच्या पाण्याचा वापर पूर्णपणे टाळावा.
- बागेसाठी अथवा झाडांसाठी नळाचे पाणी वापरू नये.
अधिकारी व पदाधिकाऱ्यांचे आवाहन: “पाणी टंचाईच्या या कठीण काळात नागरिकांनी नगरपंचायतीला पूर्ण सहकार्य करावे,” असे आवाहन नगराध्यक्ष मृणाल शेट्ये, उपनगराध्यक्ष वैभव पवार, पाणीपुरवठा सभापती यशवंत गोपाळ व सर्व नगरसेवकांनी केले आहे.
धरणावरील यंत्रणेशी छेडछाड केल्यास फौजदारी गुन्हा
पाणी टंचाईच्या काळात काही व्यक्ती धरणावरील प्लेट्स उचलून अथवा धरणाच्या संरचनेशी छेडछाड करून पाण्याचा प्रवाह बदलत असल्याचे निदर्शनास आले आहे. यामुळे मोठ्या प्रमाणावर पिण्याच्या पाण्याचा अपव्यय होत असून पाणीपुरवठा व्यवस्थेवर विपरित परिणाम होत आहे.
या गंभीर प्रकाराची दखल घेत मुख्याधिकारी प्रशांत भोसले यांनी कडक इशारा दिला आहे. धरणावरील प्लेट्स, गेट्स, झडपा, पाईपलाईन किंवा इतर कोणत्याही यंत्रणेशी छेडछाड करणे हा गंभीर गुन्हा असून, असा प्रकार आढळल्यास थेट संबंधित व्यक्तींवर फौजदारी गुन्हा दाखल करण्यात येईल, असे निर्देश मुख्याधिकाऱ्यांनी दिले आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:32 18-06-2026
