रत्नागिरी जिल्ह्यात ठिकठिकाणी पंजांची स्थापना, सुफी संतांच्या प्रेरणेने हिंदू-मुस्लिम सलोख्याचे दर्शन
रत्नागिरी: Lanja Moharram Festival (लांजा मोहरम उत्सव) आणि इस्लामी नूतन वर्षाला रत्नागिरी जिल्ह्यात मोठ्या उत्साहात प्रारंभ झाला आहे. यंदा १६ जूनपासून हिजरी सन १४४७ या नवीन वर्षाची सुरुवात झाली असून, त्यानिमित्त लांजा शहरासह जिल्ह्यातील खेड, चिपळूण, दापोली, मंडणगड, राजापूर, संगमेश्वर आणि गुहागर या सर्वच तालुक्यांमध्ये मोहरम सणाची जय्यत तयारी सुरू झाली आहे. या पवित्र महिन्यानिमित्त जिल्ह्यात ठिकठिकाणी पारंपरिक पद्धतीनुसार मानाच्या पंजांची आणि ताबूतची स्थापना करण्यात येत आहे.
लांजा शहरात सलग दोन दिवस रंगणार मिरवणुकांचा उत्साह
मोहरम सणानिमित्त लांजा शहरात दरवर्षीप्रमाणे यंदाही मोठ्या उत्साहात ताबूतची मिरवणूक काढण्यात येणार आहे. यंदा लांजात सलग दोन दिवस म्हणजेच २५ आणि २६ जून रोजी या मिरवणुका निघणार आहेत. २५ जून रोजी रात्री ९:३० ते १२ वाजेपर्यंत, तर २६ जून रोजी सायंकाळी ४ ते ७:३० वाजेपर्यंत वाजत-गाजत आणि पारंपरिक खेळ सादर करत ही मुख्य मिरवणूक काढली जाणार आहे. याशिवाय खेड, चिपळूण, दापोली या भागांतही वेगवेगळ्या तारखांना छोटे पीर आणि बडे पीर अशा दोन्ही मानाच्या पंजांची मिरवणूक काढण्यात येणार आहे.
राष्ट्रीय एकात्मता आणि जातीय सलोख्याचे प्रतीक
इस्लाम धर्माचे संस्थापक हजरत मोहम्मद पैगंबर यांचे नातू हजरत इमाम आणि हजरत हुसेन यांच्यासह ७२ कुटुंबांच्या हुतात्म्याच्या (कुर्बानी) पवित्र स्मृती जागवण्यासाठी मोहरम साजरा केला जातो. भारतात सुफी संतांच्या प्रेरणेने हा सण अनेक वर्षांपासून हिंदू-मुस्लिम बांधवांकडून एकत्र येत साजरा केला जात असल्याने, या सणाला राष्ट्रीय एकात्मता आणि जातीय सलोख्याचे एक उत्तम प्रतीक मानले जाते. मोहरम हा इस्लामी वर्षातील पहिला महिना असून हा अत्यंत पवित्र मानला जातो; तसेच या संपूर्ण महिन्यात युद्ध करणे पूर्णपणे निषिद्ध मानले गेले आहे. शिया मुस्लिम बांधवांसाठी मोहरमचा दहावा दिवस (आशुरा) हा अत्यंत महत्त्वाचा आणि विशेष असतो.
महाप्रसाद, चोंगे आणि मिठाईचे होणार वाटप
मोहरम सणानिमित्त कोकणातील रत्नागिरी शहरासह इतर सर्व तालुक्यांमध्ये विविध सामाजिक संघटना, संस्था आणि मुस्लिम बांधवांच्या वतीने ठिकठिकाणी महाप्रसाद आणि सरबत वाटपाचे आयोजन केले जाणार आहे. काही ठिकाणी लाडू, जिलेबी आणि मिठाई वाटप करून सणाचा गोडवा वाढवला जाईल. तसेच लांजासह इतर भागातही महाप्रसादाची (जेवणाची) विशेष सोय करण्यात येणार आहे. या दिवसांत मुस्लिम बांधव आपल्या घरात ‘चोंगे’ (एक गोड पदार्थ) बनवून त्याचा आस्वाद घेतात आणि गरीब व गरजूंना याचे मोठ्या प्रमाणावर वाटप करून सामाजिक बांधिलकी जपतात.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:25 19-06-2026
