रत्नागिरी जिल्हा परिषद अंतर्गत गुणवत्ताधारक शिक्षकांची निवड; ११ जून रोजी कागदपत्रांची पडताळणी पूर्ण, लवकरच नियुक्ती आदेश
कडवई: राज्यातील जिल्हा परिषद शिक्षण विभागातील रिक्त असलेली केंद्रप्रमुख पदे भरण्याच्या प्रक्रियेला मोठा वेग आला आहे. या भरती प्रक्रियेनुसार, राज्यातील एकूण २,४१० केंद्रप्रमुख पदांपैकी रत्नागिरी जिल्हा परिषद शिक्षण विभागाला तब्बल १२५ नवीन केंद्रप्रमुख मिळणार आहेत. शासनाच्या विभागीय मर्यादित स्पर्धा परीक्षा प्रक्रियेनुसार गुणवत्ताधारक शिक्षकांची या पदांवर थेट निवड करण्यात आली असून, संबंधित गुणवत्ता यादी जिल्हा परिषदेकडे प्राप्त झाली आहे. या नियुक्तीमुळे जिल्ह्यातील प्राथमिक शाळांवर गेल्या अनेक वर्षांपासून सुरू असलेल्या प्रभारी व्यवस्थेला आता पूर्णविराम मिळण्याची चिन्हे आहेत.
११ जून रोजी कागदपत्रांची पडताळणी पूर्ण; समुपदेशनाद्वारे मिळणार नियुक्ती
जिल्हा परिषद शिक्षण विभागाअंतर्गत विविध केंद्रांमधील केंद्रप्रमुखांची पदे दीर्घकाळापासून रिक्त होती. परिणामी, अनेक केंद्रांचा अतिरिक्त कारभार प्रभारी अधिकाऱ्यांकडे सोपवण्यात आला होता. या पार्श्वभूमीवर रिक्त जागांच्या अडीचपट उमेदवारांच्या कागदपत्रांची पडताळणी मोहीम हाती घेण्यात आली होती, जी ११ जून २०२६ रोजी यशस्वीरीत्या पूर्ण झाली आहे. कागदपत्रांची पडताळणी पूर्ण झाल्यानंतर आता अंतिम निवड यादी प्रसिद्ध केली जाईल. यानंतर थेट समुपदेशन (Counseling) प्रक्रिया राबवून पात्र उमेदवारांना नियुक्तीचे आदेश दिले जाणार आहेत.
शैक्षणिक गुणवत्ता वृद्धी आणि प्रभावी नियंत्रणासाठी पदे महत्त्वाची
प्राथमिक शाळांच्या कामकाजात सुसूत्रता आणण्यासाठी, प्रशासकीय कामकाजाची गती वाढवण्यासाठी तसेच शाळांवर प्रभावी नियंत्रण ठेवण्यासाठी केंद्रप्रमुख हे पद शिक्षण व्यवस्थेत अत्यंत महत्त्वाचे आणि कणा मानले जाते. या भरती प्रक्रियेमुळे रत्नागिरी जिल्ह्यातील प्राथमिक शिक्षण व्यवस्थेला मोठा दिलासा मिळणार आहे. या स्पर्धा परीक्षेतून निवडून आलेल्या अनुभवी आणि गुणवत्ताधारक शिक्षकांना शैक्षणिक नेतृत्वाची एक नवीन व महत्त्वपूर्ण संधी उपलब्ध होणार असून, यामुळे ग्रामीण भागातील शालेय गुणवत्ता वाढण्यास मोठी मदत होणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:48 19-06-2026
