२० हजार कामगारांच्या रोजगारावर टांगती तलवार; कोल्हापूर टाईप बंधाऱ्याचे काम रखडल्याने उद्योजकांमध्ये संताप
खेड: Khed Water Crisis च्या गंभीर सावटाखाली सध्या खेड तालुक्यातील लोटे औद्योगिक वसाहत आणि परिसरातील १९ गावे होरपळत असून, ही परिस्थिती अशीच राहिली तर पुढील ४८ तासांत येथील अनेक उद्योग पूर्णपणे ठप्प होण्याची भीती निर्माण झाली आहे. लोटे इंडस्ट्रीज असोसिएशनचे अध्यक्ष राज आंब्रे यांनी लोटे औद्योगिक वसाहतीतील उद्योग भवन येथे आयोजित पत्रकार परिषदेत हा इशारा दिला. औद्योगिक विकास महामंडळाने (एमआयडीसी) सध्याच्या परिस्थितीत पाणीपुरवठा करण्यास असमर्थता दर्शविल्यामुळे संपूर्ण औद्योगिक पट्ट्यात चिंतेचे वातावरण आहे.
जिल्हाधिकाऱ्यांसोबत उद्योजकांची तातडीची बैठक पाणीटंचाईच्या या गंभीर समस्येवर तोडगा काढण्यासाठी उद्योजकांच्या शिष्टमंडळाने जिल्हाधिकारी मनुज जिंदाल यांची भेट घेऊन तातडीने उपाययोजना करण्याची मागणी केली. या बैठकीला जलसंधारण विभाग, एमआयडीसी, जिल्हा परिषद तसेच इतर संबंधित शासकीय यंत्रणांचे अधिकारी प्रत्यक्ष व ऑनलाइन पद्धतीने उपस्थित होते. लोटे औद्योगिक वसाहतीतील सुमारे २० हजार कर्मचारी, कामगार आणि कर्मचारी वसाहतींसाठी किमान पिण्याच्या पाण्याची उपलब्धता सुनिश्चित करावी, अशी प्रमुख मागणी या वेळी प्रशासनाकडे करण्यात आली.
टँकरद्वारे पाणीपुरवठा करण्याचे प्रशासनाचे आश्वासन उद्योग भवन येथील पत्रकार परिषदेत असोसिएशनचे सचिव राजकुमार जैन, संचालक राजेश तिवारी, किसन चव्हाण तसेच घरडा कंपनीचे व्यवस्थापक आर. सी. कुलकर्णी उपस्थित होते. अध्यक्ष राज आंब्रे यांनी सांगितले की, कामगारांच्या पिण्याच्या पाण्याचा प्रश्न सोडवण्यासाठी नजीकच्या धरणातून टँकरद्वारे पिण्याचे पाणी उपलब्ध करून देण्याचे आश्वासन जिल्हाधिकारी मनुज जिंदाल यांनी शिष्टमंडळाला दिले आहे. त्यामुळे तात्पुरता दिलासा मिळण्याची शक्यता असली तरी उद्योगांच्या सुरळीत संचालनाचा प्रश्न अजूनही कायम आहे.
२४ कोटींचा निधी मंजूर, तरीही कोल्हापूर टाईप बंधारा रखडला सध्या लोटे औद्योगिक वसाहत पूर्णपणे कोयना धरणाच्या अवजलावर अवलंबून आहे. मात्र, या व्यवस्थेला कायमस्वरूपी पर्याय उपलब्ध करून देण्याची गरज उद्योजकांनी बोलून दाखवली. वाशिष्ठी नदीवरील फरशी तिठा येथे कोल्हापूर टाईप बंधारा उभारण्याची मागणी गेल्या अनेक वर्षांपासून प्रलंबित आहे. या प्रकल्पासाठी २४ कोटी रुपयांचा निधी मंजूर होऊन सहा ते सात वर्षे उलटली, तरी शासकीय विभागांमधील समन्वयाच्या अभावामुळे हे काम अद्याप पूर्ण होऊ शकलेले नाही. चिपळूणमध्ये पूरस्थिती निर्माण होण्याच्या भीतीमुळेही या प्रकल्पाला विरोध झाल्याचे या वेळी स्पष्ट करण्यात आले.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:20 20-06-2026
