३१ टन कोळसा घेऊन जाणाऱ्या १४ टायरी ट्रकच्या केबिनला आग; पोलीस, अग्निशमन दल आणि ग्रामस्थांच्या प्रसंगावधानामुळे जीवितहानी टळली
Amba Ghat Truck Fire | रत्नागिरी-नागपूर राष्ट्रीय महामार्गावरील प्रसिद्ध आंबा घाट परिसरात रविवारी पहाटे कोळशाची वाहतूक करणाऱ्या एका १४ टायरी ट्रकच्या केबिनला अचानक भीषण आग लागल्याची घटना घडली. रविवारी पहाटे ४ वाजण्याच्या सुमारास घाटातील गणेश मंदिराजवळ ही आग लागली. ट्रकमध्ये तब्बल ३१ टन कोळशाचा मोठा साठा भरलेला असल्याने महामार्गावर काही काळ तीव्र भीतीचे वातावरण निर्माण झाले होते. मात्र, महामार्ग पोलीस, देवरुख नगरपंचायतीचे अग्निशमन दल आणि आंबा गावातील स्थानिक ग्रामस्थांनी दाखवलेल्या समयसूचकतेमुळे आग वेळीच आटोक्यात आली आणि एक अतिशय मोठी दुर्घटना टळली.
हा ट्रक (क्रमांक MH-09-FL-9047) रत्नागिरीतील जयगड बंदर येथून सातारा जिल्ह्यातील उंब्रजच्या दिशेने कोळसा घेऊन निघाला होता. ट्रकचालक शंभू चरण यादव (वय ४८ वर्षे, रा. हजारीबाग, झारखंड) हे पहाटेच्या सुमारास आंबा घाटातून प्रवास करत असताना, अचानक इंजिन अतिउष्ण (ओव्हरहीटिंग) झाले. यामुळे केबिनमधील वायरिंगमध्ये शॉर्टसर्किट होऊन अचानक आग भडकली. काही क्षणांतच या आगीने रौद्ररूप धारण केले आणि संपूर्ण केबिनला वेढले. घटनेची माहिती मिळताच महामार्ग पोलीस मदत केंद्राच्या प्रभारी पोलीस निरीक्षक दिपाली जाधव, पीएसआय पाटील, जीपीएसआय सावंत यांच्यासह पोलीस कर्मचारी वाकरे, लांबोरे, दाभाडे, संकपाळ, शिवलकर आणि चालक कांबळे यांनी तातडीने घटनास्थळी धाव घेतली.
गतिमान बचावकार्य आणि वाहतूक नियंत्रण
घटना घडल्यानंतर देवरुख पोलीस ठाण्याचे कर्मचारी, देवरुख नगरपंचायतीचे अग्निशमन दल आणि आंबा गावातील ‘मृत्युंजयदूत’ विजय पाटील व त्यांच्या सहकाऱ्यांनी तात्काळ मदतीसाठी घटनास्थळाकडे धाव घेतली. आग लागल्यामुळे घाटातील महामार्गावरील वाहतूक काही काळासाठी विस्कळीत झाली होती. परंतु, उपस्थित पोलीस पथकाने अत्यंत कौशल्याने वाहतुकीचे नियोजन केले आणि इतर वाहनांची सुरक्षितरीत्या वाहतूक सुरू ठेवली, जेणेकरून महामार्गावर इतर कोणतीही कोंडी किंवा धोका निर्माण होणार नाही.
३१ टन कोळशाचा साठा सुरक्षित; यंत्रणेचे कौतुक
अग्निशमन दलाच्या जवानांनी स्थानिक नागरिकांच्या मदतीने अथक प्रयत्न करून आगीवर पूर्णपणे नियंत्रण मिळवले. या घटनेचे मुख्य वैशिष्ट्य म्हणजे ट्रकमध्ये असलेल्या ३१ टन कोळशाच्या साठ्यापर्यंत आगीच्या ज्वाला पोहोचण्यापूर्वीच ती विझवण्यात यंत्रणेला यश आले. या भीषण आगीत ट्रकच्या केबिनचे मोठे नुकसान झाले असले, तरी कोळशाचा साठा पूर्णपणे सुरक्षित राहिला आहे. सुदैवाने या घटनेत कोणतीही जीवितहानी झाली नसल्याने सर्वांनी सुटकेचा निःश्वास सोडला. स्थानिक प्रशासन, पोलीस आणि ‘मृत्युंजयदूत’ ग्रामस्थांच्या या तत्परतेचे सर्व स्तरांतून कौतुक होत असून, पुढील तपास महामार्ग पोलीस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:21 22-06-2026
