Ganpatipule Beach Tragedy | कोकणातील प्रसिद्ध पर्यटनस्थळ गणपतीपुळे येथील समुद्रात पर्यटनासाठी आलेले छत्रपती संभाजीनगरचे पाच तरुण वाहून गेल्याची अत्यंत दुर्दैवी घटना शनिवारी घडली. या घटनेनंतर स्थानिक प्रशासन आणि मदत यंत्रणांनी तातडीने सुरू केलेल्या शोध मोहिमेत पाचही तरुणांचे मृतदेह शोधण्यात यश आले आहे. शनिवारपासूनच समुद्रात युद्धपातळीवर शोध मोहीम राबवण्यात येत होती; त्यापैकी एका तरुणाचा मृतदेह शनिवारीच हाती आला होता, तर उर्वरित चार जणांचे मृतदेह रविवारी शोधण्यात यश आले. या दुर्दैवी घटनेमुळे गणपतीपुळे परिसर आणि तेथे आलेल्या पर्यटकांमध्ये मोठी हळहळ व्यक्त होत आहे.
घटनेचे गांभीर्य लक्षात घेऊन पोलीस यंत्रणेने तातडीने पावले उचलली. ‘कस्टम’ विभाग आणि स्थानिक मच्छीमारांच्या बोटींच्या गतिमान सहाय्याने समुद्राच्या खाडीत व परिसरात सखोल शोधमोहीम राबवण्यात आली. या शोध मोहिमेदरम्यान प्रेम आदमाने, यश कांबळे, आनंद नरवडे, अनिकेत हिवराळे आणि आदित्य राऊत या पाचही बेपत्ता तरुणांचे मृतदेह पाण्यातून बाहेर काढण्यात आले आहेत.
तीन तरुण होते कुटुंबाचा एकमेव आधार
या अपघातामध्ये मृत्युमुखी पडलेल्या तरुणांची कौटुंबिक पार्श्वभूमी अत्यंत हृदयद्रावक आहे. समुद्रात बुडालेल्या पाच तरुणांपैकी प्रेम आदमाने हा आपल्या आई-वडिलांचा एकुलता एक मुलगा होता. यश कांबळे याच्या वडिलांचे आधीच छत्र हरपले होते आणि तोच आपल्या कुटुंबाचा एकमेव आधार होता. आनंद नरवडे हा देखील आई-वडिलांचा एकुलता एकच मुलगा होता. तर आदित्य राऊत आणि अनिकेत हिवराळे या दोघांना प्रत्येकी एक भाऊ आणि एक बहीण आहे. या पाचही उमद्या तरुणांच्या मृत्यूमुळे त्यांच्या कुटुंबियांवर दुःखाचा डोंगर कोसळला आहे.
प्रशासनाचे पर्यटकांना काळजी घेण्याचे आवाहन
या गंभीर घटनेच्या पार्श्वभूमीवर प्रशासनाने गणपतीपुळे येथे येणाऱ्या सर्व पर्यटकांसाठी कडक सूचना आणि आवाहन जारी केले आहे. पावसाळ्याच्या दिवसांत समुद्राची सद्य:स्थिती आणि संभाव्य धोका लक्षात घेऊन पर्यटकांनी समुद्रस्नानासाठी किंवा पोहण्यासाठी कोणत्याही परिस्थितीत पाण्यात उतरू नये. पर्यटकांनी किनारपट्टीवर सुरक्षित अंतर राखून दुरूनच समुद्राच्या सौंदर्याचा आनंद घ्यावा, जेणेकरून अशा दुर्दैवी दुर्घटनांची पुनरावृत्ती होणार नाही, असे प्रशासनाकडून स्पष्ट करण्यात आले आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:43 22-06-2026
