मुंबई-गोवा महामार्गाच्या कामाचा स्थानिकांना फटका; घरे धोक्याच्या छायेत
रत्नागिरी: ‘Ratnagiri Heavy Rain’ मुळे सलग दुसऱ्या दिवशी संपूर्ण जिल्ह्याला मुसळधार पावसाने झोडपून काढले आहे. मंगळवारी सकाळी सोसाट्याच्या वाऱ्यासह झालेल्या या जोरदार पावसामुळे रत्नागिरी शहरासह ग्रामीण भागातील जनजीवन पूर्णपणे विस्कळीत झाले. जलसंपदा विभागाच्या पूर नियंत्रण कक्षाने सकाळी आठ वाजता प्रसिद्ध केलेल्या अधिकृत अहवालानुसार, गेल्या २४ तासांत राजापूरमधील अर्जुना प्रकल्प परिसरात सर्वाधिक १६७ मिलीमीटर इतक्या विक्रमी पावसाची नोंद झाली आहे. या पावसामुळे जिल्ह्यातील धरणांमधील जलसाठ्यात लक्षणीय वाढ झाली असून तीव्र पाणीटंचाई दूर होण्याची चिन्हे दिसू लागली आहेत.
मुंबई-गोवा महामार्गाच्या अपूर्ण कामांमुळे निर्माण झाले मोठे अडथळे
मुसळधार पावसामुळे मुंबई-गोवा राष्ट्रीय महामार्गाच्या सुरू असलेल्या कामांना मोठा फटका बसला आहे. संगमेश्वर, पाली, लांजा आणि रत्नागिरी तालुक्यातील महामार्गाच्या अर्धवट कामांमुळे रस्त्यांवर प्रचंड प्रमाणात चिखल साचला आहे. अनेक ठिकाणी महामार्गावर पाणी साचल्याने वाहतुकीचा वेग कमालीचा मंदावला असून वाहनचालकांना रस्त्यातून मार्ग काढताना मोठी कसरत करावी लागत आहे. महामार्गाच्या या अपूर्ण कामांमुळे पावसाचे पाणी थेट वस्त्यांकडे वळल्याने रत्नागिरी शहरातील खालचा फगरवठार परिसरातील पाटणकर आणि दीक्षित यांच्या घरांच्या अंगणात पाणी, माती व चिखल वाहून आला. सखल भागातील ही घरे आता धोक्याच्या छायेत आली असून चिखल घरात घुसण्याची भीती स्थानिकांनी व्यक्त केली आहे.
लांजा-साटवली मार्गावर झाड कोसळले; विद्यार्थी आणि चाकरमान्यांचे हाल
तालुक्यातील अंतर्गत रस्त्यांवरही पावसाचा मोठा प्रभाव पाहायला मिळाला. लांजा-साटवली मार्गावरील पालयेवाडी येथे मंगळवारी सकाळी ७ वाजण्याच्या सुमारास एक भलेमोठे आकेशियाचे झाड अचानक मुख्य रस्त्यावर कोसळले. ऐन गर्दीच्या वेळी घडलेल्या या घटनेमुळे रस्त्याच्या दोन्ही बाजूची वाहतूक काही काळ पूर्णपणे ठप्प झाली होती. यामध्ये एसटी बस, रिक्षा तसेच अनेक चारचाकी वाहने अडकून पडल्याने सकाळी शाळेत जाणाऱ्या विद्यार्थ्यांना आणि नोकरदारांना याचा मोठा फटका बसला.
गडनदी प्रकल्पात ५७ टक्के साठा; दुबार पेरणीचे संकट टळल्याने शेतकरी सुखावला
या मुसळधार पावसामुळे जिल्ह्यातील प्रमुख धरणांमधील पाणीपातळीत झपाट्याने सुधारणा होत आहे. गडनदी मध्यम प्रकल्पात सध्या सर्वाधिक ५७.०८ टक्के जलसाठा नोंदवला गेला आहे. त्याखालोखाल अर्जुना प्रकल्पात ४३.५६ टक्के, मुचकुंडी प्रकल्पात २९.८६ टक्के तर नातुवाडी प्रकल्पात २६.११ टक्के जलसाठा उपलब्ध झाला आहे. सध्या कोणत्याही धरणातून सांडवा विसर्ग सुरू नसल्याचे प्रशासनाने स्पष्ट केले आहे. दरम्यान, या पावसामुळे शेतकऱ्यांवरील दुबार पेरणीचे मोठे संकट टळले असून, खरीप हंगामातील शेतीच्या कामांना आता वेग आला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:32 23-06-2026
