वाहनचालकांमध्ये चिंतेचे वातावरण
चिपळूण:
Kumbharli Ghat Danger म्हणजेच कोकण आणि पश्चिम महाराष्ट्राला जोडणाऱ्या अत्यंत महत्त्वाच्या कुंभार्ली घाटात मुसळधार पावसामुळे प्रवाशांसाठी मोठा धोका निर्माण झाला आहे. गेल्या चार दिवसांपासून रत्नागिरी जिल्ह्यात कोसळणाऱ्या मुसळधार पावसामुळे कुंभार्ली घाटातील एका अतिधोकादायक वळणावर सुमारे २० फूट रस्ता खचला असून, रस्त्याखालची मातीही वेगाने सरकू लागली आहे. हा भाग वाहतुकीसाठी अत्यंत धोकादायक बनला असून वाहनचालक आणि प्रवाशांमध्ये भीतीचे वातावरण आहे. दुसरीकडे, मुंबई-गोवा महामार्गावरील परशुराम घाटात कोट्यवधी रुपये खर्च करून उभारण्यात आलेल्या गॅबियन वॉलच्या पायाखालची माती पहिल्याच पावसात वाहून गेल्याची धक्कादायक घटना समोर आली आहे.
परशुराम घाटात गॅबियन वॉलच्या सुरक्षेला तडे
यावर्षी जून महिना पावसाअभावी कोरडा गेल्याने जिल्ह्यातील बळीराजा आणि नागरिक चिंतेत होते. मात्र, जून महिना संपता-संपता पावसाचे जोरदार आगमन झाले. मुंबई-गोवा महामार्गाच्या रुंदीकरणासाठी परशुराम घाटात मोठ्या प्रमाणात उत्खनन करण्यात आले होते, तसेच काही ठिकाणी भराव टाकून रस्त्याची उंची वाढवली गेली होती. हा घाट आणि महामार्ग सुरक्षित राहावा तसेच दरडी कोसळण्याचा धोका कमी व्हावा, या उद्देशाने येथे कोट्यवधींचा खर्च करून गॅबियन वॉल (संरक्षक भिंत) उभारण्यात आली होती. मात्र, बुधवारी समोर आलेल्या माहितीनुसार, पहिल्याच जोरदार पावसात या गॅबियन वॉलच्या पायाखालची माती वाहून गेल्याने राष्ट्रीय महामार्ग विभागाच्या कामावर प्रश्नचिन्ह उपस्थित झाले आहे.
अवजड वाहतूक आणि एसटी प्रवाशांची सुरक्षा टांगणीला
कुंभार्ली घाटात रस्ता खचल्यामुळे अवजड वाहने, एसटी बस तसेच इतर लहान-मोठ्या वाहनांची वाहतूक कमालीची जोखमीची बनली आहे. या खचलेल्या भागामुळे वाहनचालकांना जीव मुठीत धरून आणि अत्यंत सावधगिरीने प्रवास करावा लागत आहे. घाटातील काही अत्यंत धोकादायक वळणांवर कायमस्वरूपी मजबूत संरक्षक भिंती उभारण्याऐवजी केवळ पिंपे (ड्रम) ठेवून तात्पुरती सुरक्षितता करण्यात आल्यामुळे स्थानिक नागरिकांनी आणि नियमित प्रवास करणाऱ्यांनी तीव्र नाराजी व्यक्त केली आहे. पावसाळ्यापूर्वी प्रशासनाने आवश्यक दुरुस्ती आणि पुरेशा संरक्षणात्मक उपाययोजना केल्या नसल्याचा थेट आरोप आता स्थानिकांकडून केला जात आहे.
कायमस्वरूपी दुरुस्तीची नागरिकांची मागणी
घाटातील संभाव्य दुर्घटना आणि मोठी जिवीतहानी टाळण्यासाठी राष्ट्रीय महामार्ग विभागाने तातडीने पावले उचलणे गरजेचे आहे. संबंधित ठिकाणी तात्पुरती मलमपट्टी न करता कायमस्वरूपी संरक्षणात्मक उपाययोजना कराव्यात, खचलेला २० फुटांचा रस्ता त्वरित दुरुस्त करावा आणि घाट परिसरात आवश्यक त्या ठिकाणी वाहतूक नियंत्रणाची प्रभावी व चोख व्यवस्था करावी, अशी आग्रही मागणी आता नागरिक, स्थानिक प्रशासन आणि वाहनचालकांकडून केली जात आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:08 03-07-2026
