कोकणातील पर्यटन विकासाला मिळणार मोठी गती; पालकमंत्री उदय सामंत यांचे महत्त्वाकांक्षी पाऊल
रत्नागिरी:
Malgund Zoo Project म्हणजेच रत्नागिरी तालुक्यातील प्रसिद्ध कवी केशवसुतांचे जन्मगाव असलेल्या मालगुंड येथे उभारण्यात येणाऱ्या भव्य ‘मालगुंड प्राणी संग्रहालया’च्या बांधकामासाठी आणि विकासासाठी महाराष्ट्र शासनाच्या सार्वजनिक बांधकाम विभागाने अखेर ई-निविदा जाहीर केली आहे. या महत्त्वाकांक्षी प्रकल्पासाठी एकूण ११५ कोटी ४२ लाख ८७ हजार १५५ रुपयांची तरतूद करण्यात आली असून, यामुळे कोकणातील पर्यटन वाढीला मोठी चालना मिळणार आहे. जिल्ह्याचे पालकमंत्री उदय सामंत यांच्या पुढाकाराने सुरू होत असलेला हा प्रकल्प कार्यरंभ आदेश मिळाल्यापासून २४ महिन्यांच्या कालावधीत पूर्ण करण्याचे उद्दिष्ट ठेवण्यात आले आहे.
प्रकल्पाचे आर्थिक नियोजन आणि तांत्रिक आराखडा
या महाप्रकल्पामध्ये १ अब्ज १ कोटी ५३ लाख १३ हजार ६७५ रुपयांचे नागरी बांधकाम (सिव्हिल वर्क) केले जाणार आहे, तर १३ कोटी २९ लाख ७८ हजार ४४८ रुपये विद्युत कामांसाठी खर्च केले जातील. याशिवाय रॉयल्टी आणि टेस्टिंगसाठी स्वतंत्रपणे ५९ लाख ९५ हजार ३२ रुपयांची तरतूद करण्यात आली आहे. या कामासाठी पात्र कंत्राटदारांना ५७ लाख ७२ हजार रुपये इसारा रक्कम जमा करावी लागणार असून, परफॉर्मन्स सिक्युरिटी म्हणून १ कोटी १५ लाख ४३ हजार रुपये निश्चित करण्यात आले आहेत.
आंतरराष्ट्रीय मानकांनुसार हिंस्र पशूंचे नैसर्गिक अधिवास
मालगुंड येथील या प्राणी संग्रहालयात वाघ, बिबट्या, अस्वल आणि लांडगा यांसारख्या हिंस्र व वन्य श्वापदांसाठी आंतरराष्ट्रीय मानकांनुसार अद्ययावत व सुरक्षित नैसर्गिक अधिवास तयार केले जात आहेत. तसेच नीलगाय, काळवीट, चितळ आणि सांबर यांसारख्या विविध हरिणांच्या प्रजातींसाठी विस्तीर्ण मोकळी जागा राखीव ठेवण्यात आली आहे. सरपटणाऱ्या प्राण्यांसाठी आधुनिक ‘रेप्टाईल हाऊस’ आणि दुर्मिळ व रंगीबेरंगी पक्ष्यांसाठी भव्य ‘एव्हिएरी’ (पक्षीघर) देखील येथे उभारण्यात येणार आहे.
भव्य टनेल अॅक्वेरियम ठरणार मुख्य आकर्षण
या प्राणी संग्रहालयाचे मुख्य वैशिष्ट्य म्हणजे येथे उभारण्यात येणारे भव्य टनेल अॅक्वेरियम (बोगदा मत्स्यालय) हे असेल. यामध्ये सागरी जीवसृष्टीचे दर्शन घडवणारे ‘सी वॉटर मरीन कम्युनिटी टनेल अॅक्वेरियम’ आणि ‘फ्रेशवॉटर मॉन्स्टर टनेल अॅक्वेरियम’ अशा दोन अत्याधुनिक रचनांचा समावेश असणार आहे. पर्यटकांना आकर्षित करण्यासाठी ही देशातील एक उत्तम वास्तू ठरेल असा विश्वास व्यक्त केला जात आहे.
अद्ययावत सुरक्षा व्यवस्था आणि बांधकाम साहित्य
संग्रहालयाच्या अंतर्गत सुरक्षेसाठी आणि चोख व्यवस्थापनासाठी ३४ आधुनिक मोटराईज्ड गेट ऑपरेटिंग सिस्टम बसवल्या जातील. या भव्य बांधकामासाठी २६०८.०० क्युबिक मीटर आरसीसी एम-२० आणि उच्च दर्जाचे काँक्रीट वापरले जाणार आहे. त्याचप्रमाणे २५१.७५ मेट्रिक टन टीएमटी/एचसीआर स्टील आणि २१६.०० मेट्रिक टन स्ट्रक्चरल स्टीलचा वापर केला जाईल. विद्युत कामांतर्गत ३६८ पॉईंट वायरिंग, ३०५०.०० मीटर लांबीची एचटी अॅल्युमिनियम केबल, ५२५.०० मीटर एचटी कंडक्टर, ६२.५ केव्हीए क्षमतेचा डीजी सेट आणि १०० केव्हीए क्षमतेचा ट्रान्सफॉर्मर बसवला जाणार आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
10:24 03-07-2026
