रत्नागिरी:
रत्नागिरी विमानतळ विकास आणि येथील पर्यटन क्षेत्राला मोठी गती देणारा एक अत्यंत महत्त्वाचा क्षण रविवारी (५ जुलै) उजाडला. भारतीय तटरक्षक दल (ICG) आणि महाराष्ट्र विमानतळ विकास कंपनी (MADC) यांच्यात रविवारी रत्नागिरी येथील हॉटेल सावंत पॅलेस येथे सामंजस्य करारावर स्वाक्षरी करण्यात आली. या करारामुळे रत्नागिरी विमानतळाचा ७५ टक्के यशस्वी टप्पा पूर्ण झाला असून येत्या तीन महिन्यांत रत्नागिरी विमानतळावरून विमानाचे पहिले टेकऑफ होईल, अशी अधिकृत घोषणा रत्नागिरीचे पालकमंत्री डॉ. उदय सामंत यांनी पत्रकार परिषदेत केली.
या विशेष करार सोहळ्याला प्रशासकीय अधिकारी आणि राजकीय क्षेत्रातील अनेक मान्यवर उपस्थित होते. यामध्ये जिल्हा परिषदेच्या अध्यक्षा अस्मिता केंद्रे, आमदार किरण सामंत, एम.ए.डी.सी.चे उपाध्यक्ष व व्यवस्थापकीय संचालक दीपक कपूर, आयसीजीएएसचे कमांडिंग ऑफिसर कुणाल नाईक, जिल्हाधिकारी मनुज जिंदल, मुख्य कार्यकारी अधिकारी वैदेही रानडे आणि पोलीस अधीक्षक नितीन बगाटे यांचा प्रामुख्याने समावेश होता. याशिवाय रत्नागिरीच्या नगराध्यक्ष शिल्पा सुर्वे, चिपळूणचे नगराध्यक्ष उमेश सकपाळ, जिल्हा परिषद उपाध्यक्ष विलास चाळके, माजी आमदार विनय नातू यांच्यासह स्थानिक उद्योजक आणि व्यावसायिक मोठ्या संख्येने उपस्थित होते.
भूसंपादनासाठी १५ कोटींचा निधी आणि राज्याशिखरावरील सौंदर्य
विमानतळ प्रकल्पाच्या सद्यस्थितीवर प्रकाश टाकताना पालकमंत्री डॉ. सामंत यांनी स्पष्ट केले की, भूसंपादनाची प्रक्रिया कोणत्याही अडचणीविना पार पडावी यासाठी १० ते १५ कोटी रुपयांचा विशेष निधी उपलब्ध करून दिला जाणार आहे. महाराष्ट्र शासनाच्या माध्यमातून रत्नागिरीतील या विमानतळाला राज्यातील सर्वात सुंदर विमानतळ म्हणून विकसित करण्याचा मानस त्यांनी व्यक्त केला. विमानतळ कार्यान्वित होताच पायाभूत सुविधांचा दर्जा उंचावण्यावर सरकारचा भर असणार आहे.
आंतरराष्ट्रीय हॉटेल ब्रँड्स आणि ‘झाडावरचे रेस्टॉरंट’
रत्नागिरी विमानतळ विकासाच्या जोडीलाच पर्यटन क्षेत्राच्या व्यावसायिक विस्तारासाठी मोठ्या घडामोडी घडत आहेत. येत्या वर्षभरात रत्नागिरीमध्ये पंचतारांकित हॉटेलची मुहूर्तमेढ रोवली जाईल, असे पालकमंत्र्यांनी स्पष्ट केले. यासाठी ‘ताज’, ‘ओबेरॉय’ किंवा ‘हयात’ यांसारख्या आंतरराष्ट्रीय ख्यातीच्या ब्रँड्सनी रत्नागिरीत यावे यासाठी विशेष प्रयत्न सुरू आहेत. यासोबतच, वन विभागाच्या जागेवर एक अत्याधुनिक ‘ॲडव्हेंचर पार्क’ उभारले जाईल, ज्यामध्ये ‘झाडावरचे रेस्टॉरंट’ (ट्री-हाउस रेस्टॉरंट) हे पर्यटकांचे मुख्य आकर्षण असेल.
हापूस आंबा, काजू निर्यात आणि महिला सक्षमीकरण
या प्रकल्पाचा थेट फायदा स्थानिक अर्थव्यवस्थेला आणि सामाजिक विकासाला होणार आहे. स्थानिक महिलांना आर्थिकदृष्ट्या सक्षम करण्यासाठी रत्नागिरी विमानतळावर महिला बचत गटांनी उत्पादित केलेल्या वस्तूंच्या विक्रीसाठी स्वतंत्र दालन (स्टॉल) राखीव ठेवण्यात येणार आहे. सर्वात महत्त्वाचे म्हणजे, हवाई वाहतूक सुरू झाल्यामुळे कोकणचा जगप्रसिद्ध हापूस आंबा आणि काजू थेट परदेशात निर्यात करणे अधिक सोपे होईल. यामुळे रत्नागिरी आणि चिपळूणसह संपूर्ण जिल्ह्यातील कृषी व्यवसायाला आणि स्थानिक उद्योगांना मोठी चालना मिळणार आहे.
कार्यक्रमाची सुरुवात अधीक्षक अभियंता मंगेश कुलकर्णी यांनी प्रास्ताविकाने केली, तर प्रांताधिकारी जीवन देसाई यांनी उपस्थितांचे आभार मानले. रत्नागिरी चेंबर ऑफ कॉमर्सचे प्रशांत पटवर्धन आणि हॉटेल असोसिएशनचे अध्यक्ष रमेश कीर यांच्यासह अनेक स्थानिक उद्योजक, नगरसेवक आणि नागरिकांच्या उपस्थितीत हा सोहळा संपन्न झाला.
“मी रायगडचा पालकमंत्री असताना नवी मुंबई विमानतळ आणि सिंधुदुर्गचा पालकमंत्री असताना चिपी विमानतळ सुरू झाले. आता रत्नागिरीचा पालकमंत्री म्हणून येथील विमानतळ सुरू होत असल्याचा मला सार्थ अभिमान आहे. रत्नागिरीला ‘स्मार्ट सिटी’ बनवण्यासाठी आम्ही कटिबद्ध आहोत.” — डॉ. उदय सामंत, पालकमंत्री
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
11:28 06-07-2026
