उद्धव ठाकरेंची ‘रामरक्षा’ आंदोलनाची हाक; अयोध्या राम मंदिर देणगी चोरी प्रकरणी सर्वोच्च न्यायालयाची केंद्र व राज्य सरकारला नोटीस
रत्नागिरी: नीट पेपरफुटीच्या प्रकरणापाठोपाठ आता अयोध्येतील राम मंदिरातील देणगी आणि मौल्यवान दागिन्यांच्या कथित चोरीच्या मुद्द्यावरून राज्यातील राजकीय वातावरण कमालीचे तापले आहे. शिवसेना (उद्धव बाळासाहेब ठाकरे) पक्षाचे नेते आणि आमदार भास्कर जाधव (Bhaskar Jadhav News) यांनी यावरून सत्ताधारी भारतीय जनता पक्षावर अत्यंत जळजळीत शब्दांत टीका केली आहे. “हे खरे हिंदुत्ववादी नसून हिंदुत्वाचे मारेकरी आहेत,” असा थेट आरोप करत त्यांनी गावागावात जाऊन भाजपचे ‘पाप’ उघड करणार असल्याचे जाहीर केले आहे.
“१,४०० कोटींची चोरी भाजपशी संबंधित संघटनांनीच केली”
आमदार भास्कर जाधव यांनी रत्नागिरीत पत्रकारांशी बोलताना थेट आकड्यांसह सत्ताधाऱ्यांवर हल्ला चढवला. राम मंदिरात तब्बल १,४०० कोटी रुपयांची चोरी झाल्याचा दावा त्यांनी केला आहे. “ही चोरी काँग्रेस, आम आदमी पक्ष किंवा जनता दलाने केलेली नाही. ही चोरी दुसरा-तिसरा कोणीही नसून थेट भाजपशी संबंधित असलेल्या संघटनांनीच केली आहे,” असा खळबळजनक आरोप जाधव यांनी केला. हा विषय अत्यंत गंभीर असून देशभरात याविरोधात आता लोकांनी उठाव करायला सुरुवात केली आहे, त्यामुळे हा मुद्दा अजिबात सोडणार नाही, असेही त्यांनी स्पष्ट केले.
पक्षीय बॅनर बाजूला सारून ‘रामाचा बॅनर’ घेऊन सभा घेणार
कलियुगातले सगळ्यात मोठे लुटारू कोण आहेत, त्यांचा खरा चेहरा जनतेसमोर आणण्याची मोठी संधी स्वतः प्रभू श्रीरामाने आपल्याला दिली आहे, अशी भूमिका भास्कर जाधव यांनी मांडली. या चोरीचे सत्य लोकांपर्यंत पोहोचवण्यासाठी आपण स्वतः कोणत्याही पक्षीय बॅनरचा वापर न करता, केवळ ‘रामाचा बॅनर’ आणि हातामध्ये ‘भगवा झेंडा’ घेऊन आपल्या मतदारसंघातील प्रत्येक भागात जाहीर सभा घेणार असल्याची घोषणा त्यांनी केली. तसेच, २०२९ च्या निवडणुकीत राम अशा लोकांना धडा शिकवल्याशिवाय राहणार नाही, असा टोलाही त्यांनी लगावला.
“अस्सल हिंदू असाल तर रस्त्यावर या” – उद्धव ठाकरे
यापूर्वी शिवसेना (उबाठा) प्रमुख उद्धव ठाकरे यांनी देखील या प्रकरणी ‘रामरक्षा’ आंदोलनाची हाक देत आक्रमक पवित्रा घेतला होता. “राम फक्त एका पक्षाचा नसून तो देशातील तमाम हिंदूंचा आणि सर्वांचा आहे,” असे सांगत त्यांनी तथाकथित भोंदू हिंदूरक्षकांना आव्हान दिले की, जर धमन्यांमध्ये अस्सल हिंदूचे रक्त असेल तर आमच्यासोबत रस्त्यावर उतरा. तपास यंत्रणांवर अविश्वास दाखवत ठाकरे म्हणाले की, चोरालाच जर त्याच्या चोरीचा निकाल लावायला सांगितला, तर तो चार दिवसांत स्वतःला ‘क्लीनचीट’ देऊन मोकळा होईल. त्यामुळे या प्रकरणाचा नि:पक्षपातीपणे निकाल लागत नाही, तोपर्यंत शांत बसणार नाही, असा इशारा त्यांनी दिला.
सर्वोच्च न्यायालयाची त्रिपक्षीय नोटीस आणि ‘SIT’ अहवालाचे आदेश
दुसरीकडे, या संपूर्ण प्रकरणाची दखल आता देशाच्या सर्वोच्च न्यायालयाने घेतली आहे. सर्वोच्च न्यायालयाने अयोध्या राम मंदिर देणगी चोरी प्रकरणात केंद्र सरकार, उत्तर प्रदेश सरकार आणि श्री राम जन्मभूमी तीर्थ क्षेत्र ट्रस्ट यांना कायदेशीर नोटीस बजावली आहे. न्यायालयाने उत्तर प्रदेश सरकारला या प्रकरणाचा सद्यस्थितीचा अहवाल सादर करण्याचे आदेश दिले असून, यामध्ये ‘एसआयटी’ (SIT) तपास अधिकाऱ्यांचा संपूर्ण तपशील समाविष्ट करण्यास सांगितले आहे. यासोबतच, या प्रकरणाशी संबंधित सर्व महत्त्वाचे सीसीटीव्ही (CCTV) फुटेज सुरक्षित जतन करण्याचे कडक निर्देशही न्यायालयाने दिले आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:25 13-07-2026
