वशिलेबाजीला चाप लावण्यासाठी सुधारित शासन शुद्धिपत्रक जारी; शैक्षणिक पात्रता, पायाभूत सुविधा आणि डिजिटल कौशल्याला मिळणार गुण
रत्नागिरी: राज्यातील नागरिकांना विविध शासकीय सेवा एकाच छताखाली, वेळेत आणि पारदर्शक पद्धतीने मिळाव्यात यासाठी महाराष्ट्र शासनाने ‘आपले सरकार सेवा केंद्र’ (Aaple Sarkar Seva Kendra) निवड प्रक्रियेत आणि नियमांत मोठे फेरबदल केले आहेत. इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता विभागाने यासंदर्भात एक महत्त्वपूर्ण सुधारित शासन शुद्धिपत्रक प्रसिद्ध केले आहे. या नव्या नियमांमुळे आता केवळ ओळखीवर किंवा किमान पात्रतेवर केंद्र मिळवणे शक्य होणार नाही. नवीन केंद्रांची मंजुरी आणि जुन्या केंद्रांचे नूतनीकरण आता थेट १०० गुणांच्या कडक निकषांवर आधारित असणार आहे.
जिल्हाधिकारी कार्यालयामार्फत होणार अर्जांची कडक छाननी
या नव्या नियमांनुसार, ग्रामीण आणि शहरी भागात ‘व्हिलेज लेव्हल आंत्रप्रेन्युअर’ (VLE) म्हणजेच केंद्र चालकाची निवड करताना शैक्षणिक गुणवत्तेसोबतच त्याच्या डिजिटल कौशल्याला आणि पायाभूत सुविधांना मोठे प्राधान्य दिले जाणार आहे. आता आलेल्या अर्जांची प्राथमिक छाननी जिल्हाधिकारी कार्यालयातील सेतू प्रभारी अधिकारी आणि जिल्हा समाजकल्याण अधिकारी हे संयुक्तरीत्या करणार आहेत. जर एकाच क्षेत्रासाठी एकापेक्षा जास्त अर्ज आले, तर नवीन गुणांकन पद्धतीचा अवलंब करून जिल्हा सेतू समितीद्वारे अंतिम पात्र उमेदवाराचा निर्णय घेतला जाईल.
पात्रता, कॉम्प्युटर ज्ञान आणि पायाभूत सुविधांसाठी गुणांची विभागणी
नवीन निकषांमध्ये उमेदवाराचे किमान वय १८ वर्षे असणे आणि तो किमान उच्च माध्यमिक शाळांत परीक्षा (इयत्ता १२ वी) उत्तीर्ण असणे बंधनकारक आहे. या प्रक्रियेत पारदर्शकता आणण्यासाठी गुणांची विभागणी पुढीलप्रमाणे करण्यात आली आहे:
- शैक्षणिक गुणवत्ता: पदवी आणि पदव्युत्तर शिक्षण असलेल्या उच्चशिक्षित उमेदवारांना अतिरिक्त गुण दिले जातील.
- संगणक साक्षरता: केंद्र चालवण्यासाठी आवश्यक असणाऱ्या संगणक साक्षरता व तांत्रिक कौशल्यासाठी स्वतंत्र गुण असतील.
- पायाभूत सुविधा: केंद्रासाठी किमान १०० चौ. फूट हवेशीर जागा, बायोमेट्रिक उपकरण, सुरक्षेसाठी सीसीटीव्ही (CCTV) आणि हायस्पीड इंटरनेट कनेक्टिव्हिटी असणे आवश्यक आहे.
- अनुभव व आर्थिक क्षमता: उमेदवाराची आर्थिक क्षमता तसेच या क्षेत्रातील त्याचा पूर्वानुभव यासाठी गुणांची स्वतंत्र तरतूद आहे.
मुलाखत अनिवार्य; गुन्हेगारी पार्श्वभूमी असलेले अर्जदार थेट अपात्र
निवड प्रक्रियेत पूर्णपणे पारदर्शकता राखण्यासाठी पात्र उमेदवारांची जिल्हास्तरीय समितीमार्फत प्रत्यक्ष मुलाखत घेतली जाईल. या मुलाखतीमध्ये उमेदवाराचे ग्राहक सेवा व्यवस्थापन आणि संवाद कौशल्याचे मूल्यांकन केले जाईल. अत्यंत महत्त्वाची बाब म्हणजे, पोलीस पडताळणीमध्ये (Police Verification) दोषी आढळणारे, गुन्हेगारी पार्श्वभूमी असलेले किंवा आर्थिक गैरव्यवहारामध्ये नाव आलेले अर्जदार या प्रक्रियेतून थेट अपात्र ठरवले जातील.
सुरुवातीला केवळ ३ वर्षांचा करार
शासनाने दिलेल्या माहितीनुसार, या कडक निवड प्रक्रियेतून अंतिम निवड झालेल्या केंद्र चालकाला सुरुवातीला ३ वर्षांच्या कालावधीसाठी अधिकृत करार दिला जाईल. या तीन वर्षांच्या काळात त्यांच्या केंद्राची कामगिरी, नागरिकांना दिलेली सेवा आणि पारदर्शकता तपासली जाईल. केंद्राच्या याच कामगिरीच्या आधारे पुढील नूतनीकरणाचा निर्णय घेतला जाईल. हा नवा निर्णय राज्यातील सर्व नवीन केंद्रांच्या निवडीसाठी आणि जुन्या केंद्रांच्या नूतनीकरणासाठी तत्काळ लागू करण्यात आला आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:59 13-07-2026
