नियम धाब्यावर बसवून काम सुरू असल्याचा राकेश भाटकर यांचा आरोप; किनारपट्टीची धूप होऊन गाव धोक्यात येण्याची शक्यता
रत्नागिरी:
रत्नागिरी तालुक्यातील प्रसिद्ध भाट्ये समुद्रकिनाऱ्यावर (Bhatye Beach) बांधण्यात येणाऱ्या नवीन बंधाऱ्याला स्थानिक भाट्ये ग्रामस्थांनी जाहीर आणि तीव्र विरोध केला आहे. हे बंधाऱ्याचे काम वेळीच थांबवले नाही, तर भविष्यात संपूर्ण भाट्ये गावाला याचा मोठा फटका बसेल आणि गावाचे कधीही भरून न निघणारे नुकसान होईल, अशी भीती व्यक्त करत ग्रामस्थांनी राज्याचे मत्स्य व्यवसाय व बंदरविकास मंत्री नितेश राणे यांना लेखी साकडे घातले आहे.
मागणी नसतानाही काम सुरू; पर्यावरणाचे नियम धाब्यावर
मिळालेल्या माहितीनुसार, रत्नागिरीतील ऐतिहासिक भाट्ये खाडी पूल जेथे संपतो, अगदी त्याच मोक्याच्या ठिकाणी सध्या या वादग्रस्त बंधाऱ्याचे काम सुरू आहे. “मुळात पर्यावरण आणि सागरी किनाऱ्यांचे (CRZ) सर्व नियम धाब्यावर बसवून हे बांधकाम रेटले जात आहे. भाट्ये ग्रामस्थांनी किंवा स्थानिक प्रशासनाने अशा कोणत्याही बंधाऱ्याची मागणी कधीही केली नसताना, हा बंधारा नक्की कोणासाठी आणि का बांधला जात आहे?” असा जाहीर प्रश्न स्थानिक ग्रामस्थ राकेश गजानन भाटकर यांनी पत्राद्वारे आणि निवेदनाद्वारे उपस्थित केला आहे.
धूप वाढून किनारपट्टीवरील घरे धोक्यात येण्याची भीती
ग्रामस्थांनी दिलेल्या निवेदनात या बंधाऱ्यामुळे होणाऱ्या भौगोलिक नुकसानीचा सविस्तर पाढा वाचला आहे. या प्रस्तावित बंधाऱ्यामुळे भाट्ये गावातील सागरी किनाऱ्याच्या दक्षिणेकडील भागात समुद्राच्या लाटांमुळे मोठी धूप (Sea Erosion) होण्याची दाट शक्यता निर्माण झाली आहे. बंधाऱ्याच्या अगदी बाजूलाच स्थानिक ग्रामस्थांची निवासी घरे आणि शेती-बागायती असणाऱ्या दोन प्रमुख जमिनीच्या जागा येतात. हा भाग आधीच नैसर्गिकदृष्ट्या संवेदनशील आणि धोक्यात आहे. अशा स्थितीत येथे होणारे बंधाऱ्याचे व पुलाचे बांधकाम स्थानिक रहिवाशांसाठी भविष्यात अत्यंत त्रासदायक ठरणार आहे.
मिऱ्या गावाची पुनरावृत्ती होण्याची भीती; मंत्रालयाकडून दुर्लक्ष
भाट्ये ग्रामस्थांनी या संदर्भातील सविस्तर निवेदन बंदरविकास मंत्री नितेश राणे यांना पाठवले आहे; मात्र अद्याप या मंत्रालयाकडून किंवा संबंधित विभागाकडून कोणतीही ठोस दखल घेण्यात आलेली नाही, अशी खंत ग्रामस्थांनी व्यक्त केली आहे.
रत्नागिरीतील नर्मदा सिमेंट भगवती बंदर आणि मिरकरवाडा येथील चुकीच्या पद्धतींच्या बंधाऱ्यांमुळे ज्याप्रमाणे मिऱ्या (Mirya) गावाची अतोनात हानी झाली, समुद्र गावाला गिळंकृत करू लागला आहे, तशीच अत्यंत गंभीर आणि भीतीदायक स्थिती भविष्यात भाट्ये गावाची होईल, असे ग्रामस्थांचे ठाम मत आहे. हे काम तातडीने थांबवून किनाऱ्याचे रक्षण करावे, अशी मागणी आता भाट्ये परिसरातून जोर धरू लागली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:36 14-07-2026
