आंदोलनकर्त्या विद्यार्थ्यांना खोट्या ड्रग्ज केसमध्ये अडकवण्याची धमकी देणारा सायन पोलिसांचा व्हिडिओ व्हायरल; गृहखात्याच्या कारभारावर सुप्रिया सुळेंचा तीव्र संताप आणि निलंबनाची मागणी
Mumbai Police Controversy: मुंबई :
दिल्लीतील जंतरमंतर येथे नीट (NEET) परीक्षेच्या पेपरफुटीविरोधात सुरू असलेल्या आंदोलनाचे तीव्र पडसाद मुंबईतही उमटत आहेत. मुंबईत शांततापूर्ण मार्गाने आंदोलन करणाऱ्या विद्यार्थ्यांना पोलिसांकडून जबरदस्तीने रोखले जात असल्याचा आरोप होत असतानाच एक अत्यंत धक्कादायक व्हिडिओ सोशल मीडियावर व्हायरल झाला आहे. या व्हिडिओमध्ये एक पोलीस कर्मचारी आंदोलनकर्त्या विद्यार्थ्याला चक्क त्याच्या खिशात ड्रग्ज ठेवून खोट्या गुन्ह्यात अडकवण्याची आणि तुरुंगात टाकण्याची धमकी देताना दिसत आहे. या प्रकारावर राष्ट्रवादी काँग्रेस (शरदचंद्र पवार) पक्षाच्या खासदार सुप्रिया सुळे यांनी तीव्र संताप व्यक्त करत राज्य सरकार आणि गृहखात्यावर प्रश्नांची सरबत्ती केली आहे.
खासदार सुप्रिया सुळे यांचा सरकार आणि पोलिसांवर जोरदार हल्लाबोल
सुप्रिया सुळे यांनी तो वादग्रस्त व्हिडिओ आपल्या सोशल मीडिया अकाऊंटवर शेअर करत थेट मुख्यमंत्री देवेंद्र फडणवीस आणि मुंबई पोलिसांना टॅग केले आहे. “आपल्या न्याय्य मागण्यांसाठी शांततापूर्ण मार्गाने आंदोलन करणाऱ्या तरुण विद्यार्थ्यांवर पोलीस बळाचा वापर केला जात आहे. आता या विद्यार्थ्यांना थेट खोट्या गुन्ह्यांत अडकवण्याच्या धमक्या दिल्या जात आहेत. ‘तुमच्या खिशात ड्रग्जच्या पुड्या ठेवून तुरुंगात टाकेन’ अशी उघड धमकी पोलिसांकडून दिली जाणे अतिशय विकृत, तितकेच निषेधार्ह आणि खाकी वर्दीला काळीमा फासणारे आहे,” अशा शब्दांत त्यांनी आपला संताप व्यक्त केला.
सुप्रिया सुळे यांनी उपस्थित केलेले ३ गंभीर प्रश्न:
१. पोलीस कर्मचाऱ्यांकडे ड्रग्ज येतात कुठून? जर पोलीस खुलेआम विद्यार्थ्यांच्या खिशात ड्रग्ज ठेवण्याची भाषा करत असतील, तर त्यांना ड्रग्जचा स्त्रोत ठाऊक आहे. मग मुंबईतील ड्रग्ज माफियांवर कठोर कारवाई का केली जात नाही?
२. राज्य सरकारला ही गुंडगिरी मान्य आहे का? मुंबई पोलीस दल हे थेट राज्याच्या गृह मंत्रालयाखाली येते. राज्याच्या राजधानीत सुरू असलेला हा प्रकार गृह खात्याला मान्य आहे का?
३. कायद्याचे उल्लंघन: आंदोलक मुलांना बनावट पुराव्यांच्या आधारे ड्रग्ज केसची धमकी देणे हा भारतीय न्याय संहिता, महाराष्ट्र पोलीस कायदा आणि मानवाधिकार कायद्यानुसार गंभीर स्वरूपाचा गुन्हा आहे.
पोलीस कर्मचारी पवन सांगळे यांची तडकाफडकी बदली; चौकशीचे आदेश
हा व्हिडिओ सोशल मीडियावर प्रचंड व्हायरल झाल्यानंतर आणि चौफेर टीकेची झोड उठल्यानंतर पोलीस प्रशासनाने तातडीने पावले उचलली आहेत. संबंधित धमकी देणाऱ्या पोलीस कर्मचाऱ्याचे नाव पवन सांगळे असून ते सायन पोलीस ठाण्यात कार्यरत आहेत. या प्रकाराची गंभीर दखल घेत पवन सांगळे यांची तडकाफडकी सायन पोलीस ठाण्यातून बदली करण्यात आली असून, वरिष्ठ अधिकाऱ्यांकडून या प्रकरणाच्या चौकशीचे आदेश देण्यात आले आहेत. मात्र, केवळ बदली न करता संबंधित कर्मचाऱ्यावर निलंबनाची कारवाई करून फौजदारी गुन्हा दाखल करावा, अशी ठाम मागणी सुप्रिया सुळे यांनी केली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
14:38 23-07-2026
