भरणे गवळवाडीजवळ भीषण अपघात; अपघातग्रस्त कारमधील चालकाला स्थानिकांनी सुखरूप बाहेर काढले, क्रेटा कारमधील चौघे फरार
खेड: Khed Highway Accident News (खेड मुंबई-गोवा महामार्ग अपघात): मुंबई-गोवा महामार्गावर खेड तालुक्यातील भरणे गवळवाडी हद्दीत शुक्रवारी एक भीषण अपघाताची घटना घडली. मुंबईहून गोव्याच्या दिशेने भरधाव वेगात जाणाऱ्या क्रेटा कारने पुढे चाललेल्या किया कारला पाठीमागून जोरदार धडक दिली. ही धडक इतकी भीषण होती की, धडकेनंतर किया कार रस्त्याच्या बाजूला उलटली. या अपघातात कर्टेल गावचे सरपंच दिनेश चव्हाण हे किरकोळ जखमी झाले आहेत.
किया कारमध्ये अडकलेल्या चालकाची स्थानिकांकडून सुटका
मिळालेल्या माहितीनुसार, धडकेनंतर किया कार रस्त्याच्या कडेला पलटी झाल्यामुळे चालक कारमध्येच अडकून पडला होता. अपघाताचा मोठा आवाज होताच परिसरातील स्थानिक नागरिकांनी तत्काळ घटनास्थळी धाव घेतली. स्थानिकांनी प्रसंगावधान राखून तातडीने मदतकार्य सुरू केले आणि कारमध्ये अडकलेल्या चालकाला सुखरूप बाहेर काढले.
अपघातानंतर क्रेटा कारमधील चौघे पसार; महामार्गावर वाहतूक कोंडी
अपघात घडल्यानंतर धडक देणाऱ्या क्रेटा कारमधील चौघा जणांनी पोलिसांच्या भीतीपोटी घटनास्थळावरून पलायन केल्याची प्राथमिक माहिती समोर आली आहे. या अपघातामुळे मुंबई-गोवा महामार्गावरील वाहतुकीचा काही काळ मोठा खोळंबा झाला होता.
घटनेची माहिती मिळताच पोलिसांनी घटनास्थळी दाखल होत अपघातग्रस्त वाहने बाजूला करून वाहतूक पूर्ववत केली. या अपघाताबाबत खेड पोलीस ठाण्यात नोंद करण्यात आली असून फरार झालेल्या क्रेटा कारमधील प्रवाशांचा व अपघाताचा पुढील तपास पोलीस करत आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:13 08-08-2026
