एकात्मिक बालविकास सेवा योजना प्रकल्प २ अंतर्गत भरती; जाणून घ्या पात्रता आणि अर्जाचा पत्ता
रत्नागिरी:
Ratnagiri Anganwadi Bharti प्रक्रियेला एकात्मिक बालविकास सेवा योजना प्रकल्प २ अंतर्गत सुरुवात झाली असून अंगणवाडी सेविका आणि मदतनीस पदांसाठी अर्ज मागवण्यात येत आहेत. पात्र आणि इच्छुक स्थानिक उमेदवारांनी ११ सप्टेंबर रोजी सायंकाळी ५ वाजेपर्यंत आपले परिपूर्ण अर्ज सादर करावेत, असे आवाहन बालविकास प्रकल्प अधिकारी यांनी केले आहे.
रिक्त पदांची ठिकाणे, शैक्षणिक पात्रता आणि वयोमर्यादा
या भरती प्रक्रियेत अंगणवाडी सेविका पदासाठी ओरी व मालगुंड रहाटाघर येथे जागा उपलब्ध आहेत. तर अंगणवाडी मदतनीस पदासाठी ओरी देणवाडी, नेवरे बाजारपेठ, गणपतीपुळे केदारवाडी, गडनरळ व नांदिवडे जि. प. या ठिकाणी रिक्त पदे भरली जाणार आहेत.
शैक्षणिक पात्रतेसाठी दोन्ही पदांसाठी उमेदवार किमान १२ वी उत्तीर्ण असणे आवश्यक आहे. पदवीधर, पदव्युत्तर, डी.एड., बी.एड. असलेल्या उमेदवारांना निवडीत प्राधान्य किंवा गुणांकन दिले जाईल. वयोमर्यादेबाबत बोलायचे झाल्यास, उमेदवारांचे वय किमान १८ ते कमाल ३५ वर्षे असावे, तर विधवा उमेदवारांसाठी कमाल वयोमर्यादा ४० वर्षांपर्यंत शिथिल करण्यात आली आहे.
आवश्यक अटी आणि अर्ज सादर करण्याचा पत्ता
उमेदवार संबंधित महसुली गाव, वाडी किंवा वस्तीतील स्थानिक रहिवासी असणे बंधनकारक आहे. याव्यतिरिक्त लहान कुटुंब नियमानुसार कमाल २ हयात अपत्ये असावीत. अर्जासोबत जातीचा दाखला, किमान २ वर्षांचा अनुभव, MSCIT संगणक प्रमाणपत्र अथवा विधवा/अनाथ असल्यास संबंधित दाखले जोडणे आवश्यक आहे. निवडीचे गुणांकन ३० जानेवारीच्या शासन निर्णयानुसार केले जाणार आहे.
इच्छुक उमेदवारांनी आपले विहित नमुन्यातील अर्ज ११ सप्टेंबर रोजी सायंकाळी ५ वाजेपर्यंत ‘बालविकास प्रकल्प अधिकारी, एकात्मिक बालविकास सेवा योजना रत्नागिरी २, शंकेश्वर पार्क, बी विंग, रूम नं. ७, जि. प. शेजारी, रत्नागिरी’ या पत्त्यावर जमा करायचे आहेत.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
17:13 02-09-2026
