गुहागरचे माजी आमदार डॉ. विनय नातू यांच्या निवेदनानंतर आ. रवींद्र चव्हाण यांचे मुख्यमंत्र्यांना पत्र; ६ प्रमुख घाट रस्ते सुस्थितीत करण्याची आग्रही मागणी
कोकण घाट रस्ते खड्डेमुक्त मागणी लावून धरत भारतीय जनता पार्टीचे महाराष्ट्र प्रदेशाध्यक्ष आमदार रवींद्र चव्हाण यांनी थेट राज्याचे मुख्यमंत्री देवेंद्र फडणवीस यांना पत्र लिहिले आहे. आगामी गणेशोत्सवाच्या पार्श्वभूमीवर मुंबई आणि इतर शहरांंतून कोकणात जाणाऱ्या लाखो चाकरमान्यांचा प्रवास सुखकर आणि सुरक्षित व्हावा, यासाठी कुंभारली घाटासह कोकणातील सर्व प्रमुख घाट रस्ते तातडीने खड्डेमुक्त व दुरुस्त करण्याची आग्रही मागणी या पत्राद्वारे करण्यात आली आहे.
कुंभार्ली घाटाची दुरवस्था आणि डॉ. विनय नातू यांचे निवेदन
कोकण व पश्चिम महाराष्ट्राला जोडणाऱ्या गुहागर-विजापूर राष्ट्रीय महामार्गावरील कुंभार्ली घाट हा अत्यंत महत्त्वाचा दुवा मानला जातो. पावसाळ्यातही अविरत सुरू राहणाऱ्या या घाटाची सध्या दुरवस्था झाली असून रस्ते खराब झाल्यामुळे प्रवाशांचे मोठे हाल होत आहेत. या संदर्भात गुहागरचे माजी आमदार डॉ. विनय नातू यांनी रवींद्र चव्हाण यांना एक निवेदन पाठवून या समस्येकडे लक्ष वेधले होते.
केवळ मुंबई-गोवा महामार्ग नव्हे, तर सर्व ६ प्रमुख घाट रस्ते दुरुस्त करण्याची गरज
दरवर्षी गणेशोत्सवाच्या काळात मुंबई-गोवा महामार्गावरील वाहतूक सुरळीत ठेवण्यासाठी अवजड वाहतूक बंदीसह माणगाव, इंदापूर व कोलाड परिसरात उपाययोजना केल्या जातात. मात्र, केवळ मुंबई-गोवा महामार्गच नव्हे, तर कोकणाला जोडणारे इतर महत्त्वाचे घाट रस्तेही गणेशोत्सवात चांगल्या स्थितीत असणे अत्यंत गरजेचे आहे.
या पार्श्वभूमीवर प्रदेशाध्यक्ष रवींद्र चव्हाण यांनी मुख्यमंत्र्यांकडे खालील ६ प्रमुख घाट रस्त्यांच्या कामांचा एकत्रित आढावा घेण्याची मागणी केली आहे:
- रायगड जिल्ह्यातील घाट: ताम्हणी घाट, वरंधा घाट आणि महाबळेश्वर घाट.
- रत्नागिरी जिल्ह्यातील घाट: कुंभारली घाट, आंबा घाट आणि अणुस्कुरा घाट.
चाकरमान्यांचा प्रवास सुखकर करण्याची मागणी
गणेशोत्सवात कोकणात येणाऱ्या चाकरमान्यांना कोणत्याही त्रासाला सामोरे जावे लागू नये, यासाठी रायगड आणि रत्नागिरी जिल्ह्यातील हे सर्व ६ प्रमुख घाट रस्ते लवकरात लवकर खड्डेमुक्त आणि वाहतुकीस विनाअडथळा व सुरक्षित करावेत, अशी मागणी आ. रवींद्र चव्हाण यांनी पत्रात नमूद केली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
12:34 09-09-2026
