‘सुवर्णसूर्य फाउंडेशन’चे प्रसाद देवस्थळी जगातील कठीण ‘खारदुंग-ला चॅलेंज’मध्ये; अभिजीत पड्याळ ४२ किमी फुल मॅरेथॉनमध्ये सहभागी
लेह मॅरेथॉन रत्नागिरी धावपटू उपक्रमांतर्गत लडाखमध्ये पर्यटनाला चालना देण्यासाठी आयोजित करण्यात आलेल्या प्रसिद्ध लेह मॅरेथॉनमध्ये रत्नागिरीतील धावपटूंनी सहभाग नोंदवला आहे. या राष्ट्रीय स्तरावरील व्यासपीठावर रत्नागिरीच्या धावपटूंनी आगामी ‘कोकण कोस्टल हाफ मॅरेथॉन’चे अत्यंत प्रभावीपणे प्रमोशन केले. या मोहिमेसाठी कोकण कोस्टल हाफ मॅरेथॉनची विशेष टीम २० ऑगस्ट रोजी रत्नागिरीहून रवाना झाली होती.
देशभरातील रनिंग कम्युनिटींना भेटी देत लेह गाठले
रत्नागिरीशी रेल्वेने जोडलेल्या विविध प्रमुख शहरांमध्ये धावपटूंच्या समुदायांना (Running Communities) एकत्र आणण्यासाठी या टीमने विशेष प्रवास केला. सुरत, वडोदरा, गांधीनगर, इंदूर, जयपूर, आग्रा आणि गाझियाबाद या शहरांना भेटी देत तेथील स्थानिक रनिंग ग्रुप्सशी संवाद साधत ही टीम लडाखमधील लेह येथे पोहोचली.
खारदुंग-ला चॅलेंज आणि फुल मॅरेथॉनमध्ये सहभाग
या अनोख्या उपक्रमाचे प्रमुख आणि ‘सुवर्णसूर्य फाउंडेशन’चे संचालक प्रसाद देवस्थळी यांनी जगातील अत्यंत खडतर आणि आव्हानात्मक मानल्या जाणाऱ्या ‘खारदुंग-ला चॅलेंज’ (७२ किमी) मध्ये सहभाग घेतला आहे. देशभरातील जवळपास ३०० निवडक स्पर्धकांमध्ये त्यांचा समावेश आहे.
यासोबतच, रत्नागिरीचे धावपटू अभिजीत पड्याळ यांनी ४२ किलोमीटरच्या मुख्य फुल मॅरेथॉन स्पर्धेत सहभाग घेऊन रत्नागिरीचे प्रतिनिधित्व केले आहे. या उपक्रमामुळे देशाच्या विविध भागांतील धावपटूंना कोकणातील क्रीडा पर्यटन आणि कोकण कोस्टल हाफ मॅरेथॉनबद्दल विशेष उत्सुकता निर्माण झाली आहे.
दैनिक रत्नागिरी खबरदार
ISO 9001:2015 CERTIFIED
(RNI NO. MAHMAR/2013/57411)
शासनमान्य रजिस्टर न्यूजपेपर
16:20 09-09-2026
