इंदापूर ते झाराप टप्प्याचा खर्च १६,९०९ कोटींवर; परशुराम घाट-आरावली पॅकेजमध्ये तब्बल १२६ टक्क्यांची सर्वाधिक वाढ
Mumbai Goa Highway Cost Escalation RTI अंतर्गत मुंबई-गोवा राष्ट्रीय महामार्गाच्या चौपदरीकरणाबाबत एक मोठी माहिती समोर आली आहे. महाराष्ट्रातील इंदापूर ते झाराप या ३५५ किलोमीटरच्या मार्गावरील १० पॅकेजचा मूळ मंजूर खर्च ११,४०९.१४ कोटी रुपये होता. मात्र, प्रकल्पाला झालेल्या अथांग विलंबामुळे हा खर्च आता १६,९०९.२२ कोटी रुपयांवर पोहोचला आहे. महामार्गाचा खर्च तब्बल ५,५००.०८ कोटी रुपयांनी म्हणजेच सुमारे ४८ टक्क्यांनी वाढल्याचे माहितीच्या अधिकारातून (RTI) स्पष्ट झाले आहे.
विशेष म्हणजे, आतापर्यंत या प्रकल्पावर ११,५७७ कोटी रुपये खर्च झाले असूनही महामार्गाचे अनेक महत्त्वाचे टप्पे अद्याप अपूर्णच आहेत. या खर्चवाढीचे सर्वाधिक ठळक आणि धक्कादायक उदाहरण रत्नागिरी जिल्ह्यातील परशुराम घाट ते आरावली या पॅकेजचे आहे. या पॅकेजचा मूळ मंजूर खर्च ९८३ कोटी रुपये होता, तो आता थेट २,२२६ कोटी रुपयांवर पोहोचला असून त्यात १२६ टक्क्यांची प्रचंड वाढ झाली आहे.
चिपळूण-रत्नागिरी पट्ट्यातील या महामार्गावर सध्या वाहतूक सुरू असली तरी अनेक ठिकाणी अपूर्ण संरचना, धोकादायक वळणाचे रस्ते आणि अपूर्ण बांधकाम क्षेत्रातूनच वाहने चालवावी लागत आहेत. भूसंपादनातील अडथळे, बांधकामपूर्व कामांमधील विलंब, विविध परवानग्या मिळण्यास झालेला उशीर आणि काही कंत्राटदारांच्या आर्थिक अडचणींमुळे प्रकल्पाला विलंब झाल्याचे केंद्र सरकारने यापूर्वी स्पष्ट केले होते. काही पॅकेजेसमध्ये कंत्राटदार बदलावा लागल्यानेही वेळापत्रक पूर्णपणे कोलमडले.
दीर्घकाळ प्रकल्प रखडल्याने बांधकाम साहित्य, मजुरी, यंत्रसामग्री आणि पुनर्वसनाचा खर्च प्रचंड वाढला आहे. मात्र, प्रत्येक पॅकेजमध्ये हा खर्च नेमका कशामुळे वाढला, याचा पारदर्शक लेखाजोखा सार्वजनिक होणे गरजेचे आहे. मूळ अंदाजपत्रक तयार करताना भूसंपादन व पूर्वतयारीचा योग्य विचार झाला होता का आणि या अवाढव्य वाढीव खर्चाची जबाबदारी कोणाची, असा थेट प्रश्न आता सार्वजनिक निधीच्या नियोजनावर उपस्थित केला जात आहे.
