मारुती मंदिर ते डॉ. बाबासाहेब आंबेडकर पुतळा मार्गावर फेरी; यश फाऊंडेशन नर्सिंग कॉलेज आणि जिल्हा सहाय्यता कक्षाचा संयुक्त उपक्रम
रत्नागिरी :
श्रीगणेशा आरोग्याचा अभियान अंतर्गत रत्नागिरी शहरात बुधवारी एक भव्य जनजागृती प्रभातफेरी काढण्यात आली. राज्याचे मुख्यमंत्री देवेंद्र फडणवीस यांच्या संकल्पनेतून आणि मंत्रालयातील मुख्यमंत्री सहाय्यता निधी कक्षाचे कक्षप्रमुख रामेश्वर नाईक यांच्या विशेष समन्वयाने संपूर्ण महाराष्ट्रभर हा महत्त्वाकांक्षी उपक्रम राबवला जात आहे. याच मोहिमेचा भाग म्हणून रत्नागिरी जिल्हा मुख्यमंत्री सहाय्यता निधी कक्ष आणि यश फाऊंडेशन नर्सिंग कॉलेज यांच्या संयुक्त विद्यमाने या प्रभातफेरीचे यशस्वी आयोजन करण्यात आले.
१० दिवस मोफत आरोग्य सेवा व तपासणी
गणेशोत्सवाच्या या पवित्र काळात सलग १० दिवस नागरिकांना त्यांच्या जवळच्या शासकीय आरोग्य संस्था तसेच सार्वजनिक गणेशोत्सव मंडळांच्या मांडवात मोफत आरोग्य तपासणी, आजारांचे निदान आणि आवश्यक वैद्यकीय सेवा उपलब्ध करून देणे हा या अभियानाचा मुख्य उद्देश आहे. जिल्ह्यातील उपकेंद्रांपासून ते थेट जिल्हा रुग्णालयापर्यंतच्या सर्व स्तरांवर या उपक्रमांतर्गत विविध आरोग्यविषयक कार्यक्रम राबवले जात आहेत.
श्रीगणेशा आरोग्याचा अभियान: प्रभातफेरी आणि मुख्यमंत्री सहाय्यता निधीबाबत माहिती
बुधवारी सकाळी शहरातील प्रमुख मार्ग असलेल्या मारुती मंदिर ते डॉ. बाबासाहेब आंबेडकर पुतळा या दरम्यान ही प्रभातफेरी काढण्यात आली. या फेरीदरम्यान विद्यार्थ्यांनी व कर्मचाऱ्यांनी ‘श्रीगणेशा आरोग्याचा’ अभियानाची माहिती देणारे फलक हातात धरले होते. तसेच गंभीर आजारांवरील उपचारांसाठी मुख्यमंत्री सहाय्यता निधी कक्षाकडून मिळणारी आर्थिक मदत, योजनेचा लाभ घेण्याची सोपी पद्धत आणि आवश्यक कागदपत्रे याविषयी नागरिकांना सविस्तर माहिती देऊन जनजागृती करण्यात आली.
प्रशासकीय अधिकारी आणि विद्यार्थ्यांचा मोठा सहभाग
या प्रभातफेरीत यश फाऊंडेशन नर्सिंग कॉलेजचे प्राध्यापक, शिक्षकेतर कर्मचारी आणि विद्यार्थी-विद्यार्थिनी मोठ्या संख्येने सहभागी झाल्या होत्या. या प्रसंगी जिल्हा मुख्यमंत्री सहाय्यता कक्षाचे वैद्यकीय अधिकारी डॉ. सुमित सावंत आणि समाजसेवा अधीक्षक केदार ढेकणे प्रामुख्याने उपस्थित होते. प्रभातफेरी यशस्वीरीत्या पार पडल्याबद्दल डॉ. सुमित सावंत यांनी यश फाऊंडेशनचे संचालक, प्राध्यापकवृंद आणि विद्यार्थ्यांचे विशेष आभार मानले.
