१५ लाख नागरिकांपर्यंत पोहोचला जनजागृतीचा संदेश; पोलीस अधीक्षक नितीन बगाटे यांच्या संकल्पनेतून ९ विशेष अभियानांचा धडाका
रत्नागिरी :
रत्नागिरी पोलीस मिशन प्रबोधन मोहिमेअंतर्गत कायदा व सुव्यवस्था, नागरिकांची सुरक्षितता आणि सामाजिक सलोखा राखण्यासाठी रत्नागिरी जिल्हा पोलीस दलाने एक महत्त्वपूर्ण पाऊल उचलले आहे. सामाजिक जनजागृतीचा प्रवाह केवळ पोलीस ठाण्यांच्या चौकटीपुरता मर्यादित न ठेवता तो थेट ग्रामसभा, शाळा-महाविद्यालये आणि नागरिकांच्या घरांपर्यंत पोहोचवण्याचा धडक निर्णय घेण्यात आला आहे. आता पोलीस अधिकारी व अंमलदार थेट ग्रामसभांमध्ये सहभागी होऊन ग्रामस्थांशी संवाद साधतील, त्यांच्या समस्या जाणून घेतील आणि कायदा व सुव्यवस्थेबाबत मार्गदर्शन करतील.
१५ लाख नागरिकांपर्यंत पोहोचला सुरक्षेचा संदेश
जिल्ह्यात कायदा व सुव्यवस्था अबाधित राखण्यासोबतच सायबर गुन्हे, अंमली पदार्थांचे दुष्परिणाम, महिला व बालक सुरक्षा, वाहतूक नियम आणि सामाजिक सलोखा या विषयांवर पोलिसांनी आतापर्यंत जिल्ह्यातील तब्बल १५ लाख नागरिकांपर्यंत जनजागृतीचा संदेश यशस्वीरीत्या पोहोचवला आहे. ग्रामसभांच्या माध्यमातून थेट संवाद साधल्यामुळे ग्रामीण भागातील नागरिकांच्या तक्रारींचे निवारण अधिक गतिमान आणि पारदर्शक पद्धतीने होण्यास मदत होणार आहे.
रत्नागिरी पोलीस मिशन प्रबोधन: नागरिकांच्या सुरक्षेसाठी ९ विशेष अभियाने
जिल्हा पोलीस अधीक्षक नितीन बगाटे यांच्या संकल्पनेतून आणि अपर पोलीस अधीक्षक बी. बी. महामुनी यांच्या मार्गदर्शनाखाली ‘मिशन प्रबोधन’ अंतर्गत नागरिकांच्या सुरक्षेसाठी विविध विशेष मोहिमा राबवल्या जात आहेत:
मिशन रायझिंग फ्लॉवर: विद्यार्थी आणि नागरिकांमध्ये अंमली पदार्थांच्या दुष्परिणामांविषयी जनजागृती करणे.
मिशन प्रगती हेल्पलाइन (९११२२२१६३२): दाखल गुन्ह्यांच्या तपासातील प्रगतीबाबत तक्रारदारांना थेट माहिती मिळण्यासाठी.
मिशन जीवन: जिल्ह्यातील ज्येष्ठ नागरिकांच्या सुरक्षिततेसाठी विशेष काळजी आणि मदत.
मिशन प्रतिसाद हेल्पलाइन (९६८४७०८३१६ / ८३९०९२९१००): नागरिकांच्या थेट सूचना, तक्रारी आणि अडचणी मांडण्यासाठी.
मिशन रॅपिड: अत्यंत गतिमान आणि तत्पर पोलीस सेवा नागरिकांना उपलब्ध करून देणे.
मिशन टेप ॲण्ड सेफ: वाहतुकीच्या नियमांचे पालन आणि रस्ते सुरक्षेसाठी जनजागृती.
डायल ११२ व सायबर जागृती (१९३०): आपत्कालीन प्रसंगी तत्काळ मदतीसाठी ‘११२’ आणि सायबर गुन्ह्यांच्या तक्रारीसाठी ‘१९३०’ या क्रमांकांचा प्रसार.
समस्या सोडवण्यावर आणि प्रतिबंधात्मक कारवाईवर भर
ग्रामसभांमध्ये पोलिसांच्या प्रत्यक्ष उपस्थितीमुळे स्थानिक पातळीवरील वाद-विवाद, गुन्हेगारी प्रवृत्ती आणि कायदा व सुव्यवस्थेचे प्रश्न निर्माण होण्यापूर्वीच त्यावर प्रतिबंधात्मक कारवाई करणे शक्य होणार आहे. पोलिसांच्या या नाविन्यपूर्ण उपक्रमामुळे पोलीस आणि नागरिक यांच्यातील विश्वास अधिक दृढ होत असून संपूर्ण जिल्ह्यातून या मोहिमेचे कौतुक केले जात आहे.
