जिल्हा परिषदेच्या श्री शामराव पेजे सभागृहात होणार मार्गदर्शन; ॲपच्या वापराबाबत माहिती देणार
Ratnagiri Pensioners MahaUpalabdhi App: रत्नागिरी जिल्ह्यातील सर्व निवृत्तीवेतनधारकांसाठी अत्यंत उपयुक्त असलेल्या ‘महाउपलब्धी’ (MahaUpalabdhi) ॲपच्या प्रभावी वापराबाबत सविस्तर माहिती व मार्गदर्शन करण्यासाठी आगामी ६ ऑक्टोबर रोजी विशेष कार्यशाळेचे आयोजन करण्यात आले आहे. जिल्हा परिषदेच्या श्री शामराव पेजे सभागृहात ही कार्यशाळा पार पडणार आहे.
ॲपच्या सुविधांबाबत मिळणार सविस्तर मार्गदर्शन
या कार्यशाळेत ‘महाउपलब्धी’ या ॲपच्या माध्यमातून निवृत्तीवेतनधारकांना (Pensioners) मिळणाऱ्या विविध सुविधांची सविस्तर माहिती दिली जाणार आहे. पेन्शनसंबंधित कामे सुलभ रीतीने पूर्ण करण्यासाठी, कागदपत्रांची पडताळणी आणि विविध सेवांचा लाभ घेण्यासाठी हे ॲप कसे अत्यंत उपयुक्त ठरेल, याबद्दल तज्ज्ञांमार्फत सखोल मार्गदर्शन केले जाणार आहे.
जिल्हा कोषागार अधिकाऱ्यांचे उपस्थित राहण्याचे आवाहन
पेन्शनसंबंधित विविध कामांमधील अडचणी दूर करण्यासाठी हे ॲप महत्त्वपूर्ण ठरणार आहे. जिल्ह्यातील जास्तीत जास्त निवृत्तीवेतनधारकांनी या कार्यशाळेला उपस्थित राहून मार्गदर्शन मिळवावे आणि डिजिटल सुविधांचा लाभ घ्यावा, असे आवाहन जिल्हा कोषागार अधिकारी प्रविंद बिरादार यांनी केले आहे.
