दिवाळीतील वाढती गर्दी लक्षात घेऊन कोकण रेल्वे मार्गावरून धावणार ६ फेऱ्यांच्या दोन साप्ताहिक विशेष गाड्या
रत्नागिरी:
कोकण रेल्वेवर प्रवाशांची वाढती गर्दी लक्षात घेऊन रेल्वे प्रशासनाने आगामी दिवाळी सणासाठी १२ विशेष ट्रेन चालवण्याचा महत्त्वपूर्ण निर्णय घेतला आहे. गणेशोत्सवानंतर आता आगामी दिवाळी सण २०२६ च्या पार्श्वभूमीवर कोकण रेल्वे मार्गावरून प्रवास करणाऱ्या हजारो नागरिक आणि पर्यटकांचा प्रवास सुकर व्हावा, यासाठी तिरुवनंतपुरम सेंट्रल ते अजमेरजवळील मदार जंक्शन दरम्यान विशेष फेऱ्या सुरू करण्यात येत आहेत. कोकण रेल्वे प्रशासन क्षमतेपेक्षा अधिक प्रवाशांची वाहतूक करत असल्याने या अतिरिक्त गाड्यांमुळे रत्नागिरी, सिंधुदुर्ग आणि रायगड जिल्ह्यातील प्रवाशांना मोठा दिलासा मिळणार आहे.
गणेशोत्सवाच्या काळात कोकण रेल्वे मार्गावर शेकडो जादा गाड्या सोडण्यात आल्या होत्या. त्याला मिळालेला प्रचंड प्रतिसाद पाहता, दिवाळीच्या सुट्ट्यांमध्ये होणारी गर्दी नियंत्रणात आणण्यासाठी ही नवी सेवा सुरू केली जात आहे. दक्षिण भारताला थेट राजस्थानशी जोडणारी ही विशेष गाडी कोकणातील प्रमुख स्थानकांवर थांबणार असल्याने ऐन गर्दीच्या काळात तिकीट आरक्षणासाठी होणारी धावपळ थांबण्यास मदत होईल.
गाडी क्रमांक ०६०१३/०६०१४ चे वेळापत्रक आणि प्रवासाचे दिवस
प्रशासनाने दिलेल्या माहितीनुसार, ट्रेन क्रमांक ०६०१३ तिरुवनंतपुरम सेंट्रल – मदार जंक्शन साप्ताहिक विशेष ट्रेन तिरुवनंतपुरम येथून दर बुधवारी म्हणजेच २१ ऑक्टोबर, २८ ऑक्टोबर, ४ नोव्हेंबर, ११ नोव्हेंबर, १८ नोव्हेंबर आणि २५ नोव्हेंबर २०२६ रोजी सकाळी ०७:४५ वाजता सुटेल. ही गाडी प्रवासाच्या तिसऱ्या दिवशी सकाळी ११:०० वाजता मदार जंक्शन येथे पोहोचेल.
परतीच्या प्रवासात ट्रेन क्रमांक ०६०१४ मदार जंक्शन – तिरुअनंतपुरम सेंट्रल साप्ताहिक स्पेशल मदार जंक्शन येथून दर शनिवारी म्हणजेच २४ ऑक्टोबर, ३१ ऑक्टोबर, ७ नोव्हेंबर, १४ नोव्हेंबर, २१ नोव्हेंबर आणि २८ नोव्हेंबर २०२६ रोजी रात्री २१:४० (९:४०) वाजता सुटेल. ही ट्रेन प्रवासाच्या चौथ्या दिवशी मध्यरात्री ००:४५ वाजता तिरुवनंतपुरम सेंट्रल येथे पोहोचेल. दोन्ही बाजूंनी मिळून या गाडीच्या एकूण १२ फेऱ्या पूर्ण होतील.
महाराष्ट्रातील आणि कोकणातील महत्त्वाचे थांबे
ही विशेष गाडी महाराष्ट्र, गोवा, कर्नाटक, केरळ, गुजरात आणि राजस्थान या राज्यांना जोडणारी ठरणार आहे. कोकण रेल्वेच्या मार्गावर सावंतवाडी रोड, कणकवली, रत्नागिरी, संगमेश्वर रोड, चिपळूण, खेड आणि माणगाव या स्थानकांवर या गाडीला अधिकृत थांबा देण्यात आला आहे. यामुळे मध्य कोकणातील प्रवाशांना उत्तरेकडे तसेच दक्षिण भारतामध्ये प्रवासासाठी थेट पर्याय उपलब्ध झाला आहे.
याशिवाय रोहा, पनवेल आणि वसई रोड या मुंबई उपनगरीय परिसरातील महत्त्वाच्या स्थानकांवरही ही ट्रेन थांबणार असल्याने मुंबई व ठाणे परिसरातील चाकरमान्यांना याचा फायदा घेता येईल. पुढे वापी, सुरत, वडोदरा जंक्शन आणि गोध्रा जंक्शन मार्गे ही गाडी राजस्थानमध्ये प्रवेश करेल.
मार्गस्थ होणारी प्रमुख स्थानके
दक्षिण आणि उत्तर भारताला जोडणाऱ्या या दीर्घ पल्ल्याच्या गाडीला मार्गातील महत्त्वाची धार्मिक, पर्यटन व व्यापारी केंद्रे जोडण्यात आली आहेत. या गाडीचे इतर थांबे खालीलप्रमाणे आहेत:
केरळ व कर्नाटक: कोल्लम जंक्शन, कायनकुलम, मावेलीकारा, चेंगन्नूर, तिरुवल्ला, चांगनासेरी, कोट्टायम, एर्नाकुलम टाउन, अलुवा, त्रिसूर, शोरानूर जंक्शन, तिरूर, कोझिकोड, कन्नूर, कासरगोड, मंगळुरू जंक्शन, सुरथकल रोड, उडुपी रोड, कुंदापुरा, मूकांबिका रोड बायंदूर, मुर्डेश्वर आणि कुमठा.
गोवा व उत्तर भारत: कारवार, मडगाव जंक्शन, थिवी, मंदसौर, नीमच, चित्तौडगड, भिलवाडा, बिजाईनगर आणि अजमेर जंक्शन.
दिवाळी सणाच्या काळात प्रवाशांची होणारी अतिरिक्त गर्दी विभागण्यासाठी आणि सुखकर प्रवासासाठी या विशेष ट्रेनची सेवा प्रवाशांनी घ्यावी, असे आवाहन रेल्वे प्रशासनाकडून करण्यात आले आहे.
