‘सेवा संकल्प अभियान २०२६’ अंतर्गत ग्रामपंचायतीकडे पाणीपुरवठा योजनेचे हस्तांतरण; जलपूजा आणि जलदिंडीने गाव परिसर दुमदुमला
मंडणगड :
‘सेवा संकल्प अभियान २०२६’ अंतर्गत जल जीवन मिशनच्या माध्यमातून पंचायत समिती मंडणगड यांच्यावतीने ग्रामपंचायत उमरोली अंतर्गत येणाऱ्या गवलवाडी या महसूल गावात २४ सप्टेंबर २०२६ रोजी ‘जल अर्पण दिन’ अत्यंत उत्साहात साजरा करण्यात आला. जल जीवन मिशनअंतर्गत गावात नव्याने उभारण्यात आलेल्या पाणीपुरवठा योजनांचे हस्तांतरण थेट ग्रामपंचायत तसेच ‘ग्रामीण पाणी पुरवठा व स्वच्छता समिती’कडे करून, गावाने स्वतःच्या पाण्याचा मालक व्हावे या मुख्य उद्देशाने या विशेष कार्यक्रमाचे आयोजन करण्यात आले होते.
या सोहळ्यादरम्यान गावात विविध सांस्कृतिक व जनजागृतीपर उपक्रमांचे आयोजन करण्यात आले. यामध्ये जल यात्रा, जल दिंडी, जलपूजा आणि जल बंधन यांसारखे उपक्रम पार पडले. तसेच गावातील पाणी टाकी व नळांना आकर्षक पद्धतीने सजवून ‘जल शृंगार’ करण्यात आला होता. याप्रसंगी ग्रामस्थांना पाण्याचे महत्त्व पटवून देत जलसंवर्धनाची आणि पाणी बचतीची सामूहिक ‘जल शपथ’ देण्यात आली.
पाणी गुणवत्ता तपासणीचे प्रात्यक्षिक आणि तांत्रिक माहिती
ग्रामीण भागातील नागरिकांना शुद्ध आणि सुरक्षित पिण्याचे पाणी मिळावे, यासाठी या कार्यक्रमात विशेष उपक्रम राबवण्यात आला. एफटीके (Field Test Kit – FTK) संचाच्या माध्यमातून पाचीच्या गुणवत्तेची प्रत्यक्ष तपासणी कशी करावी, याचे प्रात्यक्षिक उपस्थित ग्रामस्थांना करून दाखवण्यात आले. यामुळे गावातील नागरिकांना स्वतःच्या गावातील पाण्याच्या शुद्धतेची तपासणी करण्याची तांत्रिक माहिती मिळाली.
गावाच्या पाणीपुरवठा व्यवस्थेची संपूर्ण जबाबदारी आता स्वयंप्रेरणेने ग्रामस्थांनी स्वीकारली असून, भविष्यात पाणी बचत करणे, पाण्याची गुणवत्ता टिकवून ठेवणे आणि स्थानिक जलस्रोतांचे योग्य संवर्धन करण्याचा दृढ संकल्प या वेळी गवलवाडीतील नागरिकांनी केला.
लोकप्रतिनिधी आणि प्रशासकीय अधिकाऱ्यांची प्रमुख उपस्थिती
या दिमाखदार सोहळ्याला पंचायत समिती आणि स्थानिक प्रशासनातील प्रमुख पदाधिकाऱ्यांनी उपस्थिती लावून ग्रामस्थांचे कौतुक केले. या कार्यक्रमास खालील मान्यवर उपस्थित होते:
लोकप्रतिनिधी व पदाधिकारी: पंचायत समितीच्या सभापती प्रणाली चिले, उपसभापती दीपक मालुसरे, पंचायत समिती सदस्य अनिल रटाटे, दिप्ती घडशी आणि माजी सरपंच सौ. बोबले.
प्रशासकीय अधिकारी: गटविकास अधिकारी राजेंद्र आंधळे, ग्रामीण पाणी पुरवठा विभागाच्या उपअभियंता कविता जवादे, शाखा अभियंता विशाल कदम, जिल्हा जलसंधारण अधिकारी मयुरेश भवारी आणि पाणी व स्वच्छता विभागाचे जितेंद्र साळवी.
या कार्यक्रमाला गवलवाडी ग्रामस्थ मंडळ तसेच महिला मंडळाच्या सदस्यांनी मोठ्या संख्येने उपस्थित राहून जल अर्पण दिनाचा उत्साह द्विगुणित केला.
