केंद्र सरकार आणि ट्रायच्या निर्णयामुळे वर्षाला १३ ऐवजी फक्त १२ रिचार्ज करावे लागणार; टेलिकॉम कंपन्यांना नवीन नियम लागू
नवी दिल्ली:
TRAI 30 Days Recharge नियमांनुसार देशभरातील लाखो मोबाईल प्रीपेड ग्राहकांसाठी दूरसंचार नियामक प्राधिकरणाने (TRAI) मोठा दिलासा दिला आहे. केंद्र सरकार आणि ट्रायने टेलिकॉम नियमांमध्ये महत्त्वाचे बदल करत २८ दिवसांऐवजी पूर्ण ३० दिवसांच्या वैधतेचे (व्हॅलिडिटी) नवीन रिचार्ज प्लॅन लागू करण्याचे निर्देश दिले आहेत. हे नवीन नियम २१ ऑक्टोबरपासून देशभरात अमलात येणार आहेत.
केंद्र सरकारने ‘टेलिकॉम कन्झ्युमर प्रोटेक्शन (१३ वी दुरुस्ती) रेग्युलेशन, २०२६’ लागू केले असून, त्यानुसार सर्व टेलिकॉम कंपन्यांना आता संपूर्ण ३० दिवसांच्या वैधतेचे प्लॅन सादर करणे अनिवार्य करण्यात आले आहे. २८ दिवसांच्या वैधतेच्या प्लॅनमुळे कंपन्या ग्राहकांकडून वर्षभरात एका महिन्याचे अतिरिक्त पैसे वसूल करत होत्या. मात्र, आता ३० दिवसांच्या वैधतेमुळे ग्राहकांना वर्षभरात १३ ऐवजी फक्त १२ रिचार्ज करावे लागतील, ज्यामुळे सर्वसामान्य माणसाच्या खिशावर पडणारा आर्थिक ताण कमी होण्यास मदत होणार आहे.
ट्रायच्या या नव्या नियमांनुसार ग्राहकांच्या सोयीनुसार विविध पर्याय उपलब्ध करून द्यावे लागणार आहेत. यामध्ये ३० दिवस किंवा त्यापेक्षा कमी वैधतेचे व्हॉईस व एसएमएस प्लॅन समाविष्ट आहेत. तसेच दर महिन्याच्या एकाच तारखेला रिन्यू होणारे रिचार्ज प्लॅनही उपलब्ध करून दिले जातील. ज्या ग्राहकांना केवळ कॉल आणि एसएमएसची गरज आहे, त्यांच्यासाठी स्वतंत्र प्लॅन उपलब्ध असतील. याशिवाय कमी कालावधीच्या डेटा बंडल प्लॅन्ससोबत व्हॉईस आणि एसएमएस ओन्ली रिचार्ज देणे आवश्यक असणार आहे. डेटाची सुविधा नसल्याने अशा रिचार्जचे दर योग्य प्रमाणात ठेवण्याचे निर्देशही देण्यात आले आहेत.
या महत्त्वपूर्ण निर्णयाबाबत भाजप खासदार राघव चढ्ढा यांनी ‘एक्स’ (ट्विटर) पोस्टद्वारे माहिती देत केंद्र सरकार आणि ट्रायचे आभार मानले आहेत. या निर्णयामुळे प्रीपेड मोबाईल ग्राहकांची दर २८ दिवसांनी फोन रिचार्ज करण्याच्या त्रासातून कायमची मुक्ती होणार आहे.
