पालकमंत्री डॉ. उदय सामंत यांची मोठी घोषणा; पोलीस भरती अकादमी, स्पर्धा परीक्षा केंद्र आणि २५ कोटींचे साहित्य संग्रहालय उभारणार
Ratnagiri DPC Meeting मध्ये जिल्ह्याच्या सर्वांगीण विकासाला गती देण्यासह तरुणांच्या उज्ज्वल भविष्यासाठी महत्त्वपूर्ण निर्णय घेण्यात आले आहेत. जिल्हा नियोजन समितीच्या (DPC) बैठकीत मागील २०२५-२६ या आर्थिक वर्षातील १०० टक्के म्हणजेच ४४१.४३ कोटी रुपयांच्या निधी खर्चास सर्वानुमते मंजुरी देण्यात आली. यासोबतच जिल्ह्यातील नऊच्या नऊ तालुक्यांत दुष्काळसदृश परिस्थिती जाहीर करण्यासाठी शासनाकडे तातडीने पाठपुरावा केला जाईल, अशी ग्वाही उद्योग तथा पालकमंत्री डॉ. उदय सामंत यांनी दिली. बैठकीत पोलीस भरती पूर्व प्रशिक्षण अकादमी आणि स्पर्धा परीक्षा केंद्र उभारण्याचाही धोरणात्मक निर्णय घेण्यात आला.
१०० टक्के निधी खर्चावर शिक्कामोर्तब; चालू वर्षात ४७४.५५ कोटींचे नियोजन
जिल्हा नियोजन समिती सभागृहात पालकमंत्री डॉ. उदय सामंत यांच्या अध्यक्षतेखाली ही आढावा बैठक पार पडली. मागील आर्थिक वर्षात सर्वसाधारण योजनेचे ४०६ कोटी, अनुसूचित जाती घटकाचे ३४ कोटी आणि आदिवासी घटकाचे १.४३ कोटी असा एकूण ४४१.४३ कोटींचा निधी १०० टक्के खर्च झाला असून त्यावर बैठकीत शिक्कामोर्तब करण्यात आले. चालू आर्थिक वर्ष २०२६-२७ साठी मंजूर ४७४.५५ कोटींपैकी प्राप्त २८४.७३ कोटींच्या निधी वाटपाचा आणि विकासकामांचा सविस्तर आढावा या वेळी घेण्यात आला.
पोलीस भरती अकादमी, स्पर्धा परीक्षा केंद्र अन् २५ कोटींचे साहित्य संग्रहालय
पालकमंत्री डॉ. उदय सामंत यांनी बैठकीत विविध महत्त्वाकांक्षी प्रकल्पांची घोषणा केली. युपीएससी आणि एमपीएससी करणाऱ्या विद्यार्थ्यांसाठी स्वतंत्र स्पर्धा परीक्षा मार्गदर्शन केंद्र तसेच पोलीस भरतीपूर्व प्रशिक्षण अकादमी डीपीसीच्या माध्यमातून उभारली जाणार आहे. याशिवाय मराठी भाषेच्या संवर्धनासाठी २५ कोटी रुपये खर्चून जागतिक दर्जाचे साहित्य संग्रहालय उभारण्यात येत आहे. जिल्ह्यात रोजगाराच्या संधी निर्माण करण्यासाठी कोकाकोला, गोवा शिपयार्ड, डिफेन्स शिपयार्ड, सेमीकंडक्टर आणि भाताच्या गवतावर गॅस निर्मिती प्रकल्प सुरू होत असल्याचे त्यांनी स्पष्ट केले.
९ तालुके दुष्काळग्रस्त जाहीर करण्यासाठी पाठपुरावा; १० हजार वनराई बंधारे बांधणार
जिल्ह्यातील सर्व ९ तालुके दुष्काळग्रस्त घोषित करण्यासाठी शासनाकडे पत्र पाठवून पाठपुरावा केला जाईल, असे सांगतानाच पालकमंत्र्यांनी प्रशासनाला तत्पूर्वी सरसकट पंचनामे करण्याचे निर्देश दिले. पाणी नियोजनासाठी श्रमदानातून १० हजार वनराई बंधारे बांधण्याचा संकल्प आखण्यात आला आहे. या बैठकीस खासदार नारायण राणे, खासदार सुनील तटकरे, महसूल राज्यमंत्री योगेश कदम, जि. प. अध्यक्ष अस्मिता केंद्रे, आमदार भास्कर जाधव, शेखर निकम, प्रमोद जठार, अनिकेत तटकरे, ज्ञानेश्वर म्हात्रे, किरण सामंत, जिल्हाधिकारी मनुज जिंदल आणि पोलीस अधीक्षक नितीन बगाटे उपस्थित होते.
