संचालक मंडळाची संख्या २१ वरून २५ वर; ऐन दिवाळीत निवडणुकीचे रणशिंग फुंकले जाण्याची शक्यता
रत्नागिरी: Ratnagiri District Central Bank Election च्या दृष्टीने सहकार क्षेत्रातील घडामोडींना वेग आला असून, रत्नागिरी जिल्हा मध्यवर्ती सहकारी बँकेच्या आगामी निवडणुकीसाठीची अंतिम मतदारयादी अखेर अधिकृतपणे जाहीर करण्यात आली आहे. या यादीनुसार जिल्ह्यात विविध सहकारी संस्था आणि वैयक्तिक मिळून एकूण १,२०३ मतदार मतदानाचा हक्क बजावण्यासाठी पात्र ठरले आहेत. बँकेच्या सध्याच्या संचालक मंडळाचा कार्यकाळ येत्या डिसेंबर महिन्यात संपत आहे. त्यामुळे सहकार विभागाकडून या निवडणुकीपूर्वीच्या कायदेशीर प्रक्रिया वेगाने राबवल्या जात असून, ऐन दीपावलीच्या काळातच निवडणुकीचे रणशिंग फुंकले जाण्याची दाट शक्यता वर्तवली जात आहे.
या निवडणुकीचे मुख्य वैशिष्ट्य म्हणजे यावेळी संचालक मंडळाच्या रचनेत झालेली वाढ होय. यापूर्वी जिल्हा बँकेमध्ये २१ संचालक कार्यरत होते. मात्र, नवीन रचनेनुसार यामध्ये ४ संचालकांची वाढ करण्यात आली असून, आता एकूण २५ संचालकांच्या निवडीसाठी ही मतदान प्रक्रिया पार पडणार आहे. यामध्ये तालुका स्तरावरून प्रतिनिधित्व करणाऱ्या ९ संचालकांचा प्रामुख्याने समावेश आहे.
विविध सहकारी संस्थांच्या मतदारांचे वर्गीकरण
एकूण १,२०३ मतदारांमध्ये प्राथमिक कृषी पतपुरवठा व विकास सेवा सहकारी संस्था तसेच धान्य अधिकोष सहकार संस्थांचे सर्वाधिक ३३७ मतदार आहेत. याशिवाय इतर विविध क्षेत्रांतील सहकारी संस्थांचे मतदार खालीलप्रमाणे आहेत:
नागरी व ग्रामीण पतसंस्था आणि बँका: नागरी सहकारी पतसंस्था, ग्रामीण बिगरशेती पतसंस्था व नागरी सहकारी बँकांचे १३६ मतदार.
गृहनिर्माण संस्था: गृहनिर्माण व गृहतारण सहकारी संस्थांचे १३६ मतदार.
इतर संस्था व वैयक्तिक: सर्वसाधारण ट्रस्ट, मंडळ व व्यक्ती १२६ मतदार.
मजूर संस्था: मजूर सहकारी संस्थांचे ९४ मतदार.
मच्छीमार संस्था: मच्छीमार सहकारी संस्था व अन्य संस्थांचे ८६ मतदार.
कृषी प्रक्रिया व पणन: कृषी पणन आणि शेतीमाल प्रक्रिया संस्थांचे ८० मतदार.
पगारदार संस्था: पगारदार नोकरांच्या संस्थांचे ५३ मतदार.
स्वयंरोजगार व कामगार: स्वयंरोजगार, बेरोजगार व हमाल कामगार संस्थांचे ४९ मतदार.
दुग्ध व पशुपालन: दुग्ध, पशुपैदास, वराहपालन व पाणीपुरवठा संस्थांचे ४८ मतदार.
औद्योगिक व वाहतूक: औद्योगिक वाहतूक व्यवसाय व देखरेख उत्पादक संस्थांचे ४० मतदार.
कुक्कुटपालन संस्था: कुक्कुटपालन व शेळी-मेंढीपालन संस्थांचे १८ मतदार.
या सर्व विविध संस्थांचे प्रतिनिधी आणि वैयक्तिक मतदार मिळून जिल्हा मध्यवर्ती बँकेच्या नवीन संचालक मंडळाच्या निवडीसाठी आपले मत नोंदवणार आहेत. सहकार विभागाच्या या पूर्वतयारीमुळे जिल्ह्यातील राजकीय व सहकार क्षेत्रातील वातावरण तापण्यास सुरुवात झाली आहे.
