टोरेंट प्रकल्पावरून केंद्रीय गृहमंत्री अमित शाहांवर डागली तोफ; ‘एमएमआर’ भाग ताब्यात घेऊन मुंबई गुजरातला जोडण्याचा डाव असल्याचा थेट आरोप
कर्जत/रायगड : Raj Thackeray Karjat Meeting Speech संदर्भात रायगड जिल्ह्यातील कर्जत येथील सायडोंगर परिसरात गुजरातच्या टोरेंट (Torrent) कंपनीकडून प्रस्तावित असलेल्या प्रकल्पाविरोधात मनसे अध्यक्ष राज ठाकरे यांनी केंद्र आणि राज्य सरकारवर अत्यंत घणाघाती शब्दांत टीकेचा भडीमार केला आहे. "हे सगळं महाराष्ट्राला लुबाडण्यासाठी सुरू आहे, मुंबई आणि एमएमआर (MMR) परिसर गुजरातला जोडण्याची मनिषा यामागे आहे," असा थेट आणि गंभीर आरोप राज ठाकरे यांनी कर्जत येथील जाहीर सभेतून केला.
या आंदोलनाच्या मुद्द्यावरून राज ठाकरे यांनी थेट केंद्रीय गृहमंत्री अमित शाह यांच्यावरही ताशेरे ओढले. "कुऱ्हाडीचा आवाज येतो, पण देवाच्या काठीचा आवाज येत नाही. ती ज्या दिवशी बसेल, त्या दिवशी तुम्ही केलेली पापं तुम्हाला आठवतील," अशा कडक शब्दांत त्यांनी टीका केली.
‘हा प्रकल्प नेमका कुणाच्या भल्यासाठी?’ – राज ठाकरेंचे सवाल
कर्जतमधील सभेला संबोधित करताना राज ठाकरे यांनी या टोरेंट प्रकल्पाच्या पारदर्शकतेवर अनेक गंभीर प्रश्न उपस्थित केले.
ग्रामसभेत चर्चा झाली का?: एवढा मोठा विनाशकारी प्रकल्प कर्जतमध्ये येत असताना त्याची माहिती ग्रामसभा, ग्रामपंचायत किंवा विधानसभेत दिली गेली का? आणि दिली असल्यास ती मराठीत उपलब्ध का नाही?
विजेचे वितरण कोणामार्फत?: या प्रकल्पातून तयार होणारी वीज महाराष्ट्राला मिळणार की एखाद्या खासगी उद्योगपतीच्या घशात घातली जाणार?
डेटा सेंटरचा वापर: महाराष्ट्रात येणाऱ्या डेटा सेंटरला मोठ्या प्रमाणावर वीज लागणार आहे. त्यासाठी ही सगळी नैसर्गिक साधनसंपत्ती एकाच खासगी व्यक्तीच्या फायद्यासाठी राबवली जात आहे का?
‘२००० कोटी कुठून आणले?’ अन् निवडणूक आयोगावर निशाणा
सभेत बोलताना राज ठाकरे यांनी सत्ताधाऱ्यांवर आर्थिक घोळ आणि राजकीय फोडाफोडीवरून जोरदार हल्ला चढवला. "शिवसेनेचे ४० आमदार फोडण्यासाठी जर ५०-५० खोके म्हणजेच दोन हजार कोटी रुपये खर्च झाले असतील, तर हा एवढा मोठा पैसा नेमका आला कुठून?" असा सवाल त्यांनी केला. तसेच निवडणूक आयोगाच्या मदतीने मतांची चोरी करून आणि ताकद दाखवून सत्तेवर राहण्याचा हा प्रकार सुरू असल्याचे सांगत, "जनता जर जिवंत राहिली आणि जागी झाली, तरच हे सरकार घाबरेल; अन्यथा तुमची जंगलं आणि घरं अशीच नष्ट केली जातील," असा इशारा त्यांनी दिला.
‘मराठी माणसाने सावध राहावे; तरुणांनी नेतृत्व हाती घ्यावे’
राज ठाकरे यांनी स्पष्ट केले की ते उद्योगांच्या किंवा राज्याच्या प्रगतीच्या विरोधात नाहीत. "महाराष्ट्रात समृद्धी आणि वैभव आलेच पाहिजे, पण महाराष्ट्रात काय व्हावे हे बाहेरच्या लोकांनी नाही तर महाराष्ट्राने ठरवले पाहिजे," असे त्यांनी ठामपणे मांडले.
छत्रपती शिवाजी महाराजांच्या निधनानंतरही सव्वाशे वर्षे मराठ्यांनी सत्ता गाजवली, मग आजचा मराठी माणूस इतका थंड का पडला आहे? असा सवाल करत त्यांनी, "उद्या तुमच्याही घराच्या दरवाजावर धोक्याची टकटक होणार आहे. त्यामुळे सावध राहा! महाराष्ट्र मराठी माणसाचाच राहिला पाहिजे आणि या लढ्याचे नेतृत्व आता तरुणांनी हातात घ्यावे, मी तुमच्या पाठीशी खंबीरपणे उभा राहीन," असा विश्वास त्यांनी उपस्थितांना दिला.
