राज्य शासनाकडून अध्यादेश जाहीर; रत्नागिरीसह राज्यातील सर्व सहकारी संस्थांच्या निवडणुका अनिश्चित काळासाठी पुढे ढकलल्या
रत्नागिरी: Ratnagiri District Central Cooperative Bank Election Postponed संदर्भात राज्यातील भीषण दुष्काळी परिस्थिती आणि त्यावरील मदतकार्याच्या पार्श्वभूमीवर राज्य शासनाने एक महत्त्वपूर्ण निर्णय घेतला आहे. दुष्काळ निवारण व मदतकार्यासाठी अधिकारी व कर्मचारी वर्ग तैनात करताना सहकारी संस्थांच्या निवडणुकीमध्ये हे अधिकारी व्यस्त राहून त्याचा जनतेच्या मदतीवर परिणाम होऊ नये, यासाठी राज्य सरकारने राज्यातील सर्व सहकारी संस्थांच्या निवडणुका पुढे ढकलण्याचा निर्णय घेतला असून, त्याबाबतचा अधिकृत अध्यादेश जाहीर केला आहे. यामुळे रत्नागिरी जिल्हा मध्यवर्ती सहकारी बँकेची (Ratnagiri DCC Bank) निवडणूकही आता अनिश्चित काळासाठी पुढे ढकलण्यात आली आहे.
राज्यातील तब्बल ३०४ तालुक्यांमध्ये दुष्काळी परिस्थिती निर्माण झाल्यामुळे दुष्काळ निवारण व मदतकार्याशी संबंधित विविध उपाययोजनांची तातडीने अंमलबजावणी करणे काळाची गरज बनली आहे. यासाठी महसूल, कृषी, पशुसंवर्धन, सहकार, ग्रामविकास, पाणीपुरवठा, जलसंधारण तसेच अन्य संबंधित विभागांवर अतिरिक्त प्रशासकीय जबाबदारी निर्माण झाली आहे. अशा परिस्थितीत सदर तालुक्यांमधील सहकारी संस्थांची निवडणूक प्रक्रिया चालू ठेवल्यास शासकीय अधिकारी व कर्मचारी निवडणूक प्रक्रियेत गुंतण्याची शक्यता असून, त्याचा थेट परिणाम दुष्काळ निवारण व मदतकार्याच्या कार्यवाहीवर होण्याची दाट शक्यता आहे.
याबाबत राज्य पतसंस्था फेडरेशनचे अध्यक्ष तथा रत्नागिरी जिल्हा मध्यवर्ती सहकारी बँकेचे संचालक ॲड. दीपक पटवर्धन यांनी माहिती दिली की, राज्य शासनाच्या आदेशानुसार जिल्हा बँकेची निवडणूक पुढे ढकलण्यात आली आहे. सध्या कार्यरत असलेल्या संचालक मंडळाबाबत अध्यादेशात काही नमूद केले नसले, तरी शासनाकडून याबाबत लवकरच नवीन आदेश निघू शकतील व संचालक मंडळांना निवडणुकीबाबत आदेश होईपर्यंत काम करण्याची संधी मिळू शकते.
